अमूक शक्तिबाट लिङदेनलाई प्रधानमन्त्रीको प्रस्ताव, सत्ता राजनीतिमा नायक बन्दै रवि !

२२ पुष, काठमाडौं । नेपाली कांग्रेस नेतृत्वको गठबन्धन तोडेर प्रधानमन्त्री बनेका नेकपा माओवादीका अध्यक्ष पुष्पकमल दाहाल ‘प्रचण्ड’लाई २६ पुष कटाउन गाह्रो हुने देखिएको छ । नेकपा एमालेको सहयोगमा पुष १० मा प्रधानमन्त्री बनेका प्रचण्डले २६ पुषमा संसदबाट विश्वासको मत लिने तयारी गरेका छन् । उनको यो तयारीलाई असफल बनाउन बलियो राजनीतिक शक्तिकेन्द्र कसरतमा लागेको छ । नयाँ समीकरण बन्ने अवस्था आएमा उनले विश्वासको मत नपाउने देखिएको छ ।

प्रधानमन्त्री बने लगत्तै चीन सरकारको सदासयता प्रधानमन्त्री प्रचण्डका लागि भारी हुने संकेत देखिएको छ । सत्ता समीकरण परिवर्तन गराउन दक्षिण—पश्चिममा शक्तिहरु काठमाडौंमा केन्द्रित भएको बताइन्छ । दुई दिन यता, देशको आन्तरिक राजनीतिसमेत प्रधानमन्त्री प्रचण्डको प्रतिकुल देखिएको छ । उच्च राजनीतिक स्रोतका अनुसार राष्ट्रिय प्रजातन्त्र पार्टीका अध्यक्ष राजेन्द्र लिङदेनलाई प्रधानमन्त्रीका रुपमा प्रस्ताव गरिएको छ । तर, राप्रपाले यसको आधिकारिक पुष्टि गरेको छैन् ।

राप्रपाका एक नेताले दिएको जानकारी अनुसार मन्धिपरिषद विस्तारमा भागबण्डा मिलाउन कठिन भएको अवस्थामा राप्रपाले उपप्रधानमन्त्रीसहित तीन मन्त्रालय मागेपछि प्रधानमन्त्री प्रचण्डले उसलाई सरकारमा सहभागी नगराउँदा के हुन्छ भनेर ओलीसँग सोधेका थिए । राप्रपा नभएपनि विश्वासको मतका लागि समस्या नहुने र मन्त्री बनाउने कुरामा पनि सहज हुने तर्क प्रधानमन्त्री प्रचण्डको थियो । यो विषय एकाएक बाहिरिएपछि राप्रपा पनि सशंकित बनेको थियो ।

काठमाडौं केन्द्रित शक्तिकेन्द्रका प्रतिनिधिहरुले नेकपा एमाले र माओवादीबाहेक दलका नेताहरुसँग चरणबद्ध छलफल गरिसकेको बताइन्छ । नयाँ समीकरणको सम्भावना बढेपछि उपेन्द्र यादव नेतृत्वको जनता समाजवादी (जसपा) ले पनि सरकारलाई दिएको समर्थन फेरिन सक्ने संकेत दिएको छ । रेशम चौधरीको रिहाइको मागललाई मूलविषय बनाएको नागरिक उन्मुक्ति पार्टीले पनि सर्तमाथि सर्त राखिरहेको छ । जनमत पार्टीका अध्यक्ष सीके राउतसँग पनि नयाँ समीकरणका विषयमा छलफल भएको बताइएको छ ।

नेपाली कांग्रेसका सभापति शेरबहादुर देउवामार्फत दलका नेतासँग शक्तिकेन्द्रका प्रतिनिधिहरुले भेट गरिरहेको बताइन्छ । बिहीबार जसपाका अध्यक्ष उपेन्द्र यादवले सभापति देउवासँग भेट गरेका थिए । भेटमा समीकरणबारे छलफल भएको थियो । नेकपा एकीकृत समाजवादीले पनि यही समीकरणको विषयलाई लिएर प्रधानमन्त्री प्रचण्डलाई विश्वासको मत दिने कि नदिने भन्ने निर्णय गरेको छैन् । स्रोतका अनुसार अहिले राप्रापा अध्यक्ष लिङदेनमा सहमति जुटाउन प्रयास भइरहेको छ । राष्ट्रिय स्वतन्त्र पार्टी (रास्वपा) का अध्यक्ष रवि लामिछाने प्रधानमन्त्रीका लागि राजनीतिमा परिपक्क नभइसकेको भन्दै लिङदेनलाई प्रस्ताव गरिएको स्रोत बताउँछ ।

दुवैतर्फका सत्ता समीकरणका लागि रास्वपाका अध्यक्ष एवं उपप्रधान तथा गृहमन्त्री रवि लामिछाने निर्णायक शक्तिका रुपमा देखिएका छन् । नेपालका प्रधानमन्त्री प्रचण्डलाई असफल बनाउन चलखेल भइरहेको कुरा भारतीय मिडियाहरुले पनि उठाएका छन् । अहिले भारतीय मिडिया जगतमा चीन सरकारको सहयोगमा बनेको भनिएको पोखरा क्षेत्रीय विमानस्थलको विषयसँग जोडेर प्रधानमन्त्रीको आलोचना भइरहेको छ । भारतले चीन समर्थित सरकार नेपालमा बनेको भन्दै चर्चा गरिहेको छ । तर, यसबारे नेतालको परराष्ट्र मन्त्रालय र भारतस्थित नेपाली राजदुतावासले कुनै प्रतिक्रिया दिएका छैनन् ।

नेपालको सत्ता समीकरण परिवर्तन गराउन कम्मर कसेर नेपाल आएको उच्च राजनीतिक गिरोहका बारे पनि नेपालको जासुसी संयन्त्र बेखबर छ । गृहमन्त्री रहेका रवि लामिछाने पनि अहिले पर्ख र हेरको अवस्थामा छन् । उनी दुवै समीकरणका निर्णयक व्यक्ति पनि हुन । राप्रपाले विश्वासको मत नदिएको अवस्थामा रास्वपाले पनि नदिए प्रधानमन्त्री प्रचण्ड असफल हुनेछन् । लिङदेनलाई प्रधानमन्त्री बनाउन कस्सिएको गिरोह पनि उनकै प्रतिक्षामा छ । नागरिकताको विषयलाई लिएर रवि अहिले परिस्थिति हेरेर मात्र निर्णय लिने पक्षमा देखिएका छन् ।

बाहिरबाट नेपाली कांग्रेसका केही नेताहरुले पनि यो प्रयास जारी राखेको बताइन्छ । कांग्रेसका युवा नेताहरुले कांग्रेस पदाधिकारीलाई दलहरु र त्यसका नेतृत्व केन्द्रित भएर छलफल थाल्न दवाव दिएका छन् । अहिले राप्रपालाई सरकारमा ल्याउने प्रयास जारी छ । वाग्मती प्रदेश सरकारको नेतृत्व पनि राप्रपाले खोजेको छ । यसमा कांग्रेसले साथ दिए एमाले र माओवादी बाहेक पनि राप्रपाको सरकार बन्छ ।

प्रचण्डलाई असफल बनाउने खेल सुरु भएपछि प्रदेश प्रमुखहरुले पनि हतारमा सरकार गठनका लागि बहुमत देखाउन आह्वान गरेका छन् ।
दुई प्रदेशमा त संघीय संसद अधिवेशन सुरु भएकै दिन सरकारका लागि बहुमतसहित दावी गर्नुपर्ने अवस्था छ । अहिले सरकारमा रहेका उपप्रधान तथा गृहमन्त्री रवि लामिछाने र प्रधानमन्त्री प्रचण्डका बीचमा पनि सम्बन्ध राम्रो छैन् । प्रचण्डलाई समर्थन गरेको भन्दै उनको सामाजिक सञ्चालमा विरोध भइरहेको छ । यी सबै राजनीतिक परिदृष्य हेर्दा प्रधानमन्त्री प्रचण्डलाई संकटमा पार्ने प्रयास सबैतिरबाट भएको देखिन्छ । सत्ता सहयात्री दल नेकपा एमालेले भने राष्ट्रपति,सभामुख र मुख्यमन्त्री लगायत महत्वपूण नियुक्त हात नपारेसम्म प्रचण्डलाई साथ दिने देखिएको छ ।