नाफामूखि बैंकहरुलाई सामाजिक उत्तरदायित्वमा ध्यान दिन राष्ट्रपतिको आग्रह

२४ पुष, काठमाडौं । राष्ट्रपति विद्यादेवी भण्डारीले बैंक तथा वित्तीय संस्थाहरु नाफामूखी बन्दै गएको भन्दै संस्थागत सामाजिक उत्तरदायित्वमा पनि ध्यान दिन आग्रह गरेकी छन् । उनले बैंक तथा वित्तीय संस्थाको उदेश्य उचित नाफा रहेपनि नाफासँगै सामाजिक उत्तरदायित्वमा ध्यान दिन आग्रह गरेकी हुन् । बैंक तथा वित्तीय संस्था परिसंघ (सिबिफिन)को तेस्रो वार्षिक साधारणसभालाई सम्बोधन गर्दै आइतबार राष्ट्रपति भण्डारीले बैंकहरु सामाजिक उत्तरदायित्वमा पनि अग्रेसर हुनुपर्ने बताइन् ।

भण्डारीले देशमा आत्मनिर्भर अर्थतन्त्र निर्माणका लागि राष्ट्रिय पुँजी निर्माण र त्यसको विवेकशिल परिचालन अपरिहार्य रहेको भन्दै यसका लागि बैंकहरुले उद्यमशिलताको विकासमा जोड दिनुपर्ने बताइन् । स्वदेशी उत्पादन बढाएर आयात घटाउने र निर्यात प्रवर्दधनमा जोड दिनु पर्नेमा बताउँदै केही समय यता बैंकहरुले भोगिरहेको समस्याबारे आफू जानकार रहेको उल्लेख गरिन् । उनले सम्बन्धित निकायलाई समस्या समाधानका लागि पहल गर्न पनि उनले आग्रह गरेकी छन् ।

समस्या समाधानका लागि सरकारले सहयोग गर्न जरुरी रहेको भन्दै उनले सरकार र निजी क्षेत्र एक अर्काको परिपुरक बन्नु पर्ने बताइन् । पूर्व अर्थमन्त्री युवराज खतिवडाले पछिल्लो एक दशकमा वित्तीय प्रणालीमा तीव्र विकास भएको बताए । नेपालको वित्तीय प्रणाली मजबुत र सुरक्षित रहेको र पछिल्ला महिनाहरुमा डिजिटल बैंकिङमा पनि धेरै प्रगति भएको बताए ।

उनले लाइसेन्समा गरिएको कडाइले बैंक सबल बनेको भन्दै वित्तीय सारक्षता कार्यक्रमले बैंकिङ पहुँच बढेका, सानो निक्षेप बीमा कार्यक्रमले महत्वपूर्ण भूमिका निभएको र कृषि क्षेत्रमा जाने कर्जा बढेकोले पुँजीवृद्धिमा बैंकहरु सफल भएकाले लगानी गर्न सक्षम भएको बताए । राष्ट्र बैंकका गभर्नर महाप्रसाद अधिकारीलेअझै पनि वित्तीय प्रणालीमा मूल्य स्थिरता, वाहृय क्षेत्र र वित्तीय स्थिरता कायम गर्नुपर्ने चुनौति कायमै रहेको भन्दै विगतको अप्ठेरो अवस्थाबाट केही सुधार हुँदै गएको भए पनि चुनौति अझै पनि प्रयाप्त रहेको बताए ।