एमाले नेतृत्वमा बनेको प्रदेश १ को सरकारमा माओवादी नजाने

२५ पुष, विराटनगर । नेकपा माओवादी प्रदेश नम्बर एकले एमाले नेतृत्वको सरकारमा सहभाथि नहुने निर्णय गरेको छ । सत्तारूढ दलका शीर्ष नेताहरूको निर्णयलाई चुनौती दिँदै प्रदेश १ माओवादी केन्द्रले सरकारमा सहभागी नहुने निर्णय गरेको हो । मुख्यमन्त्रीमा प्रदेश १ का माओवादी केन्द्रका प्रदेश सांसदहरूको भावना विपरीत निर्णय गरेकाले सरकारमा नजाने माओवादी केन्द्रले जनाएको छ ।

माओवादी केन्द्रका संसदीय दलका नेता इन्द्रबहादुर आङ्बोले यस प्रदेशका प्रदेश सांसदहरूको भावना विपरीत प्रदेश सरकारको नेतृत्व आलोपालोको सहमति नगरेकाले सरकारमा नजाने बताएका छन् । उनले सत्तारूढ दलका शीर्ष नेताहरूले यस प्रदेशमा सरकारको नेतृत्वको विषयमा गरेको निर्णय सच्याउन माग गरेका हुन् ।

एमालेका नेता हिक्मतकुमार कार्कीलाई मुख्यमन्त्री नियुक्तिका लागि संसदीय दलको बैठकले समर्थन गर्ने निर्णय गरिसकेकाले तत्काल त्यो फिर्ता गर्न नमिल्ने अवस्था रहेको तर माओवादी केन्द्र सरकारमा सहभागी नहुने आङ्बोको भनाइ छ ।

नवनियुक्त मुख्यमन्त्री कार्कीले ५ सदस्यीय मन्त्रीमण्डल गठन गरेर शपथ लिने तयारी गरेका बेला माओवादी केन्द्रले सरकारमा सहभागी नहुने निर्णय गरेको छ । कार्कीले आज दिउँसो २ बजे प्रदेश प्रमुख परशुराम खापुङबाट मुख्यमन्त्रीमा शपथ लिने कार्यक्रम रहेको छ ।