सुदूरपश्चिममा सरकारमा सहभागिताबारे नागरिक उन्मुक्तिले २४ घण्टाभित्र निर्णय लिने

२५ पुष, काठमाडौं । नागरिक उन्मुक्ति पार्टीले सुदूरपश्चिम प्रदेशमा सरकार गठनमा पार्टीको सहभागिताबारे २४ घण्टाभित्र निर्णय लिने भएको छ । उसले सरकारमा सहभागी हुने या नहुनेबारे निर्णय लिन २४ घण्टाको समय मागेको छ ।

सत्ता साझेदार दलका शीर्ष नेताहरुको आइतबार बसेको बैठकले ७ वटै प्रदेशको मुख्यमन्त्री, सभामुख र उपसभामुख भागबण्डा गरेको थियो । जसमा नागरिक उन्मुक्तिलाई सुदूरपश्चिम प्रदेशमा उपसभामुख लिन प्रस्ताव गरिएको थियो ।
सुदूरपश्चिममा नागरिक उन्मुक्तिले भने मुख्यमन्त्री दाबी गर्दै आएको थियो । पार्टीका नेता गंगराम चौधरीले ‘प्रदेश सरकारको हकमा के गर्ने भन्ने निर्णय गर्न हामीले २४ घण्टाको समय मागेकोे बताए ।

पार्टीले २०७२ साउन ७ मा भएको टिकापुर घटनासँग जोडेर पार्टीका संरक्षक रेशम चौधरीसहित थुप्रै नेताहरु जेलमा रहेका र कयौंलाई झुठा मुद्दा लगाइएको भन्दै बन्दीको रिहाई र मुद्दा खारेजीको लिखित प्रतिबद्धता खोजेको छ ।

सोही मागबारे प्रतिवद्धता नआएकै कारण उसले संघीय सरकारमा समर्थन मात्र गरेको छ । सहभागी भइसकेको छैन । लिखित प्रतिवद्धता नआएसम्म सरकारमा सहभागी नहुने र कालान्तरमा राज्य मौन बसेको अवस्थामा समर्थन समेत फिर्ता लिने तयारी उसको छ ।