मलेसियामा बन्धक बनाइएकामध्ये ६ जना नेपाल फर्किँदै

२५ पुष, काठमाडौं । मलेसियामा बन्धक बनाइएका १३ जना नेपालीमध्ये ६ जना भोलि नेपाल फर्किँदैछन् । उद्धार भएकामध्ये ६ जना भोलि मंगलबार स्वदेश फर्किने प्रधानमन्त्रीको सचिवालयले जनाएको छ

नेपालबाट मलेसिया गएका नेपालीहरु समस्यामा परेको गुनासो प्राप्त भएपछि सोमबार बिहान प्रधानमन्त्री पुष्पकमल दाहाल ‘प्रचण्ड’ले बन्धक बनाइएका र अन्य समस्यामा परेका नेपालीहरुको अवस्था बुझेर तत्काल रिहाई तथा उद्दारको पहल गर्न मुख्यसचिव शंकरदास बैरागीलाई निर्देशन दिएका थिए ।

निर्देशनपछि सरकारले परराष्ट्र मन्त्रालयमार्फत मलेसियास्थित नेपाली राजदूतावाससँग सम्पर्क गरी बन्धक बनाइएका नेपालीहरुको अवस्था बुझेर उद्धार गरेको हो । मलेसियाको पीआएस फरेस्ट म्यानेज्मेन्ट कम्पनीमा कार्यरत अलपत्र १३ जना नेपाली नागरिक स्वदेश फर्किने भएका हुन ।