संसदको पहिलो बैठक सुरु, दलका नेताहरुले सम्बाेधन गर्ने क्रम जारी

२५ पुष, काठमाडौं । नवगठित प्रतिनिधिसभाको पहिलो बैठक सुरु भएको छ । सोमबार दिउँसो १ बजे संसद भवन नयाँबानेश्वरस्थित वीरेन्द्र अन्तर्राष्ट्रिय सम्मेलन केन्द्रमा प्रतिनिधिसभाका ज्येष्ठ सदस्य (सांसद) पशुपति शमसेर जबराले सभामुखको भूमिका निर्वाह गरिरहेका छन् ।

संवैधानिक व्यवस्था अनुसार सभामुख र उपसभामुखको चयन नहुँदासम्म संसदको ज्येष्ठ सदस्यले बैठकको अध्यक्षता गर्ने व्यवस्था छ ।

सोही मुताविक जबराले बैठक संचालन गरिरहेका छन् । उनले बैठकमा राष्ट्रपति विद्यादेवी भण्डारीबाट प्राप्त प्रधानमन्त्री नियुक्त तथा मन्त्री नियुक्त तथा संसद बैठक आह्वानसम्बन्धी पत्र पढेर सुनाएका छन् ।

उनले बैठक संचालनका लागि १० जनाको नामावली चयन गरिएको जानकारी दिएका छन् । बैठकमा दलीय प्रतिनिधित्वका अधारमा बोल्ने वक्ताहरुले बोल्ने क्रम जारी छ । सोही क्रममा सबैभन्दा पहिले प्रधानमन्त्री प्रचण्डले सम्बोधन गरेका छन् ।

अहिले नेपाली कांग्रेसका सभापति शेरबहादुर देउवाले सम्बोधन गरिरहेका छन् । गएको मंसिर ४ मा सम्पन्न प्रतिनिधिसभा निर्वाचनबाट प्रतिनिधिसभा सदस्यहरु निर्वाचित भएपछि बसेको यो पहिलो बैठक हो । बैठकको आह्वान राष्ट्रपतिबाट भएको थियो ।