संसदलाई सरकारको रबर छाप नबनाउन सांसद प्रेम सुवालको आग्रह

२५ पुष, काठमाडौं । नेपाल मजदुर किसान पार्टी  (नेमकिपा)का सांसद प्रेम सुवालले संसदलाई रबरको छायाँ बनाउन नहुने बताएका छन् ।

प्रतिनिधिसभाको सोमबार बसेको पहिलो बैठकलाई सम्बोधन गर्दै उनले संसदलाई सरकारको रबरको छायाँ नभएर प्राज्ञिक थलो बनाउनुपर्ने बताए । उनले देशलाई फाइदा नगर्ने एमसीसी लगायत सम्झौताहरु खारेज गर्नुपर्ने बताए ।

जनताको समस्या समाधान र उनीहरुको आवाज बुलन्द गर्न संसद प्रयोग गर्नुपर्ने भन्दै उनले यसअघि संसदमा प्रतिपक्ष दल प्रतिपक्षजस्तो नभएको आरोप पनि लगाए ।

उनले युवा शक्ति रोजगारकै लागि विदेश पलायन हुनु पीडादायी विषय बनेको भन्दै त्यसलाई अहिलेका सरकारसँग नीति कार्यक्रम के छ ? भन्दै प्रश्न गरे । पलायन राेक्नेबारे नीति तथा कार्यक्रम ल्याउन सरकारसँग आग्रह गरे ।