सरकारको ‘न्युनतम तथा साझा कार्यक्रम’ सार्वजनिक, वयस्कलाई रोजगारी ग्यारेन्टी गर्ने अर्थमन्त्रीको दाबी

२५ पुष, काठमाडौं । सरकारको ‘न्युनतम तथा साझा कार्यक्रम’ सार्वजनिक गरिएको छ । उपप्रधानमन्त्री तथा अर्थमन्त्री विष्णुप्रसाद पौडेलले सोमबार आयोजित एक कार्यक्रम मार्फत साझा कार्यक्रम सार्वजनिक गरेका हुन् ।

कार्यक्रम प्रस्तुत गर्ने काम साझा कार्यक्रम संयत्रअन्तर्गत गठित मस्यौदा उपसमितिका संयोजक मन्त्री पौडेलले गरेका हुन् ।

यही पुष १० मा संसदको दोस्रो ठूलो दल नेकपा (एमाले)सहित ७ दलको समर्थनमा तेस्रो ठूलो दल नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’को नेतृत्वमा सरकार गठन भएयता सत्तारुढ दलहरुको सहमतिमा यो कार्यक्रम ल्याइएको हो ।

कार्यक्रममा रोजगारका लागि विदेश पुगेर अलपत्र परेका र अवैधानिक रुपमा बसिरहेका नेपाली मजदुरहरुको उद्धारका लागि ‘हटलाइन सेवा’ सुरु गर्ने बताएका छन् ।

यस्तै समूदायबीच अन्तरसम्वन्ध स्थापित गर्न सार्वजनिक यातायातको विकास गर्नुका साथै पालिकाको मुख्यालयसम्म पुग्ने पक्की सडक निर्माण गर्ने अर्थमन्त्रीले बताए ।

यस्तै सरकारले यस वर्ष गाडी नकिन्ने र नयाँ सार्वजनिक निकाय खोल्न रोक लगाउने कार्यक्रममा उल्लेख छ । सीमाकाे व्यवस्थापन प्रभावकारी तवरले गर्ने जनाइएकाे छ ।

साझा कार्यक्रम ७ दलीय उच्च स्तरीय संयत्रले आइतबार मात्र अन्तिम रुप दिएको थियो । साझा कार्यक्रमको प्रति एमालेका अध्यक्ष समेत रहेका संयन्त्रका संयोजक केपी शर्मा ओलीले प्रधानमन्त्री प्रचण्डलाई हहस्तान्तरण गरेका छन् ।