विश्वासको मतबारे निर्णय गर्न कांग्रेस संसदीय दलमा छलफल जारी

२६ पुष, काठमाडौं । सरकारलाई विस्वासको मत दिने कि प्रतिपक्षमा बस्ने भन्ने अन्योलमा परेको नेपाली कांग्रेसको संसदीय दलको बैठकबाट यसबारे निर्णय गर्दैछ । कांग्रेस बैठक अहिले जारी छ । बैठकमा छलफल चलिरहेको छ । १० पुसमा प्रधानमन्त्री बनेका माओवादी अध्यक्ष पुष्पकमल दाहाल ‘प्रचण्ड’ लाई विश्वासको मत दिने वा नदिने भन्ने विषयमा निर्णय गर्न बैठकमा छलफल चलिरहेको छ । त्यसअघि पदाधिकारीबीच छलफल राखिएको थियो  ।

२७५ सदस्यीय प्रतिनिधि सभामा १६९ सांसदले प्रचण्ड सरकारलाई विश्वासको मत दिने निश्चित भए पनि प्रमुख प्रतिपक्ष भनिएको कांग्रेस अनिर्णित छ । प्रधानमन्त्री प्रचण्ड सोमबार मात्र कांग्रेस सभापति शेरबहादुर देउवालाई भेट्न धुम्बाराही पुगेका थिए ।

भेटमा प्रचण्डले विश्वासको मत माग्दा देउवाले सकारात्मक प्रतिक्रिया दिएका छन् । देउवाले विश्वासको मत दिने बचन दिए पनि आधिकारिक निर्णय भइसकेको छैन । त्यसका लागि देउवाले आज बिहान संसदीय दलको बैठक बोलाएका हुन् ।

कांग्रेसभित्र प्रचण्ड सरकारलाई विश्वासको मत दिनुपर्ने पक्षमा संस्थापन पक्ष छ । कोइराला समूह भने प्रतिपक्षमा बस्नुपर्ने अडानमा छ । खासगरी महामन्त्रीद्व गगन थापा र विश्वप्रकाश शर्मा प्रतिपक्षमै बसेर शक्ति आर्जन गर्नुपर्ने पक्षमा छ । विस्वासको मत दिएमा प्रतिपक्षबिहीन राष्ट्रिय बन्नेछ ।