सरकारको निर्णयले राप्रपा ‘उत्साहित’, गाेरखा नगरपालिकाको नाम परिवर्तन गर्ने कसरत शुरु

२६ पुष, काठमाडौं । केन्द्र सरकारले मंगलबार गरेको निर्णयको प्रभाव स्थानीय तहमा देखिन थालेको छ । सरकारले सोमबार मात्र पृथ्वीनारायण शाहको जन्मजयन्तीको दिन भोलि पुष २७ गते बुधबार देशभर र देशबाहिर नेपाली दूतावास तथा कुटनीति नियोगहरुमा सार्वजनिक बिदा दिने निर्णय गरेको थियो ।

यसबाट राजतन्त्रको वकालत गर्दै आइरहेको राप्रपाका नेताहरू उत्साहित भएका छन् । उसले पृथ्वीनारायणको जन्मस्थान गोरखामा रहेको गोरखा नगरपालिकालाई नाम परिवर्तन गर्ने कसरत सुरु गरेको छ ।

राप्रपाका प्रवक्ता तथा प्रचार विभाग प्रमुख मोहनकुमार श्रेष्ठले आजै मात्र सामाजिक संजालमार्फत गोरखाको सदरमुकाम क्षेत्रमा रहेको गोरखा नगरपालिकाको नाम परिवर्तन गरी पृथ्वीनारायण राख्ने सार्वजनिक रुपमा प्रस्ताव गरेका छन् ।३०१औं पृथ्वी जयन्तीको पूर्वसन्ध्यामा उनले गोरखा नगरपालिकाको नाम परिवर्तन गर्न प्रस्ताव गरेका हुन् ।

‘पृथ्वी भूमि भएको नगरपालिकाको नाम गोरखा कायम राखिराख्नु जरुरी छैन, नगरपालिकाको नाम परिवर्तन गरी पृथ्वीनारायण नगरपालिकाू बनाऔं’ उनले लेखेका छन् ।