सुदूरपश्चिममा नागरिक उन्मुक्तिले एमालेलाई साथ दिने

२६ पुष, धनगढी । सुदूरपश्चिम प्रदेशमा सरकार गठन गर्न नागरिक उन्मुक्ति पार्टीले नेकपा (एमाले)लाई साथ दिने भएको छ ।

आफ््नो माग सम्बोधन गर्न लिखित सम्झौता गर्ने पार्टीलाई साथ प्रदेश सरकार गठनमा सघाउने बताउँदै आइरहेको नागरिक उन्मुक्तिले एमालेलाई साथ दिने निर्णय भएको पार्टीका प्रदेश सांसद गंगाराम चौधरीले बताए । चौधरी सो दलका प्रमुख सचेतक समेत हुन् ।

नागरिक उन्मुक्तिले केन्द्रमा प्रधानमन्त्री पुष्पकमल दाहाल ‘प्रचण्ड’ नेतृत्वको सरकारलाई समर्थन गरेको छ । तर सरकारमा भने सहभागी जनाएको छैन । टिकापुर घटनामा जोडेर राज्यले मुद्दा लगाएर जेलमा राखिएका रेशम चौधरी लगायत नेता कार्यकर्ताहरुले रिहाइ नभएसम्म सरकारमा नजाने अडान उक्त पार्टीले राख्दै आएको छ । सुदूरपश्चिममा एमालेले नागरिक उन्मुक्तिको साथ पाएसँगै उसैले सरकार गठन गर्ने निश्चितप्रायः भएको छ ।

५३ सदस्यीय प्रदेशसभा रहेको सुदूरपश्चिममा बहुमतका लागि कम्तीमा २७ जना प्रदेशसभा सदस्य आवश्यक पर्छ । यहाँ नागरिक उन्मुक्ति पार्टीको समर्थनले केन्द्रका सत्ता साझेदार दल माओवादी केन्द्र, नेकपा एमाले, नागरिक उन्मुक्ति र राप्रपाका गरी २९ सिट पुग्छ ।

यहाँ नेपाली कांग्रेसका १९, नेकपा (माओवादी)का ११, एमालेका १०, नागरिक उन्मुक्तिका ७, नेकपा (एकीकृत समाजवादी)का ४, राप्रपाका १ र स्वतन्त्र १ जना प्रदेशसभा सदस्य छन् ।

एमालेले सुदुरपश्चिम प्रदेश संसदीय दलको नेतामा प्रदेश सांसद राजेन्द्र रावललाई चयन गरिसकेको छ । सरकार गठनका लागि भोलिको समयसीमा तोकेर प्रदेश प्रमुखबाट दाबी आह्वान भइसकेको छ ।