दुई डीआईजी छानविनमा, एक एसपी हेडक्वार्टरमा, एक इन्स्पेक्टरको ग्रेड घटुवा

२६ पुष, काठमाडौं । प्रहरी प्रधान कर्यालयले प्रदेश लुम्बिनी र मधेश प्रदेशका डीआईजीविरुद्ध छानविन शुरु गरेको छ । लुम्बिनी प्रदेशका डीआईजी नलप्रसाद उपाध्याय र मधेश प्रदेशका डीआईजी मसाउद आलम खाँका विरुद्ध उजुरी परेपछि उनीहरुको विषयमा छानविन थालिएको स्रोतले जनाएको छ ।

‘उहाँहरुको विरुद्ध सचिवालयमा उजुरीको चाङ लागेको छ ती सबै उजुरीलाई लिएर प्रहरी प्रधान कार्यालयले सूक्ष्म अनुसन्धान गरिरहेको छ उहाँहरुलाई प्रहरी प्रधान कार्यालयमा तानेर वा त्यही राखेर के गर्दा उपयुक्त हुन्छ त्यसरी नै सूक्ष्म छानविन शुरु भएको हो’, प्रहरी प्रधान कार्यालय स्रोतले भन्यो । स्रोतका अनुसार दुवै डीआईजीले मातहत निकायसँग आर्थिक लाभ लिएको र प्रहरी कार्यालयमा कार्यरत अधिकारीहरुसँग घुस लिएको आरोप लागेको छ । ‘धरै जसो जुनियर अधिकृतहरुबाट गुनासो परेको छ’, स्रोतले भन्यो ।

डीआईजी उपाध्यायले लुम्बिनी प्रदेशका सबै अधिकृतहरुसँग आर्थिक लाभ लिने गरेको तथा कोही अधिकृतलाई नभेटे जुनियर अधिकृतहरुको पनि खल्ती छाम्ने गरेको उजुरी परेको छ । त्यस्तै खाँले भन्सार प्रशासन र सशस्त्र प्रहरीसँग मिलेर आर्थिक लाभ लिने गरेको उजुरी परेको छ । उनीहरु दुवैलाई प्रहरी प्रधान कार्यालयले एकपटक चेतावनी दिएपनि नरोकिएपछि छानविन शुरु गरेको हो ।

यस्तै सीमा नाकाबाट मिलेमतोमा तस्करी गराएको उजुरीपछि प्रहरी प्रधान कार्यालयले पश्चिम नवलपरासीका प्रहरी प्रमुख एसपी ऋषिराम कँडेललाई मुख्यालय झिकाएर छानविन थालेको छ । यसअघि लागुऔषध मुद्दामा दुई भारतीयलाई फसाएको घटनामा पनि एसपी कँडेल विभागीय कारबाहीमा परिसकेका थिए । तर, गम्भीर घटना भएपनि त्यतिबेला राजनीतिक संरक्षणमा सामान्य कारबाही मात्र भोगेका एसपी कँडेलमाथि यतिबेला विस्तृत छानविन गरी जिल्ला इन्चार्जबाट हटाइएको हो ।

दुई साताअघि उनले पैसा असुलेको आरोपमा दुईजना सादा पोसाकमा कार्यरत प्रहरीलाई पक्राउ गरेका थिए । पछि लुम्बिनी प्रदेशका डीआईजी नलप्रसाद उपाध्यायको आदेश भन्दै उनीहरूलाई कारबाहीविनै छाडेका थिए । सादा पोसाकमा प्रहरी खटाएर मिलेमतोमा एसपीले नै तस्करी गराउँदै आएको आधार भेटिएपछि उनीमाथि विस्तृत छानबिन अघि बढेको प्रहरी प्रधान कार्यालय स्रोतले जनाएको छ ।

तीन साता अघि इलाका प्रहरी कार्यालय, बुटवलका डीएसपी ठगबहादुर केसी केन्द्रीय अनुसन्धान ब्युरो (सीआईबी)ले खटाएको टोलीबाट पक्राउ परेका थिए । बरामद गरेको सुन आफैँले लुकाएको उजुरीका आधारमा प्रहरी प्रधान कार्यालयले गोप्य रूपमा टोली खटाएर सुन र नगद बरामद गरेको हो । उनलाई निलम्बन गरी थप छानविनका लागि एक समिति बनेको थियो । एसएसपी चन्द्रकुवेर खापुङको नेतृत्वमा उनीमाथि छानविन भइरहेको छ । डीएसपी केसी यसअघि अनेक विवादमा मुछिए पनि राजनीतिक संरक्षणकै कारण कारबाही हुन सकेको थिएन ।

यस्तै इलाका प्रहरी कार्यालय, केशेरगन्ज सर्लाहीका इन्स्पेक्टर रोशन थापा पनि कारबाहीमा परेका छन् । लागुऔषध मुद्दामा आर्थिक चलखेल गरेर वास्तविक अभियुक्तलाई जोगाउने प्रयास गरेको खुलेपछि उनीमाथि तीन ग्रेड घटुवाको कारबाही भएको छ । साथै, इप्रकाबाट समेत हटाइएको छ । उनीमाथि थप छानविन भैरहेको प्रहरी प्रधान कार्यालयले जनाएको छ । यस्तै काठमाडौमा रहेका प्रहरी वृत्त प्रमुखहरुमाथि पनि निगरानी शुरु गरिएको छ । महानगरीय प्रहरी कार्यालयका प्रमुख फेरिएसँगै निगरानी शुरु भएको हो ।