घनश्याम भुसालले राखे एकीकृत समाजवादी प्रवेशका लागि यस्तो प्रस्ताव

२६ पुष, काठमाडौं । आमचुनावअघि नेकपा (एमाले) छाडेर रुपन्देही १ बाट स्वतन्त्र उम्मेदवार उठेका वामपन्थी नेता घनश्याम भुसाल पूर्वसहकर्मी माधवकुमार नेपाल नेतृत्वको नेकपा (एकीकृत समाजवादी)मा प्रवेश गर्ने तयारीमा छन् ।

तर उनले प्रवेश गर्नुअघि उनले विभिन्न प्रस्ताव अगाडि सारेका छन् । प्रस्तावमा सकारात्मक जवाफ आए उनी छिटै एकीकृत समाजवादीमा औपचारिक रूपमा प्रवेश गर्ने भएका छन् । उनले ‘हाम्रो राजनैतिक वैभव र अवसर’, ‘अहिलेका कार्यभार’ र ‘मेरो विश्वास’ शीर्षकअन्तर्गत ५ बुँदे प्रस्ताव अघि सारेका छन् ।

उनले कम्युनिष्ट पार्टीहरु इतिहासको व्याख्या गर्ने एतिहासिक स्थान रहेको बताउँदै एकीकृत समाजवादीका नेता कार्यकर्ताहरुले विचार, सिद्धान्त र संगठन विस्तारमा गरिरहेका प्रयास सकारात्मक रहेको बताएका छन ।

साथै उनले नेकपा (एमाले)को नवौं महाधिवेशनले लिएका नीति र कार्यभार पूरा गर्ने अभियानसहित अगाडि बढ्नुपर्ने, लोकतन्त्रमा आधारित क्रान्तिकारी पार्टी निर्माणमा अगाडि बढ्नुपर्ने, पार्टीमा खास व्यक्तिको व्यक्तित्व, पहिचान र प्रतिष्ठा मात्र कायम रहने अहिलेको संरचना भत्काउनुपर्ने लगायत प्रस्ताव राखेका छन् ।

प्रस्तावको जवाफ एकीकृत समाजवादीले दिइसकेको छैन । उनी जवाफको प्रतिक्षामा छन् । रुपन्देही १ बाट उनी एमालेका सचिव छबिलाल विश्वकर्मासँग पराजित भएका थिए । एमालेबाट अलग भएर एकीकृत समाजावादी गठन गर्दा उनी एमालेमै फिर्ता भएका थिए । तर गएकाे मंसिर ४ मा भएकाे प्रतिनिधिसभा चुनावमा अध्यक्ष केपी  शर्मा ओलीले टिकट नदिएपछि उनी स्वतन्त्र उठेका थिए ।