संसद बैठकमा ओलीले देउवालाई ‘गुरु जी’ भनेपछि…

२६ पुष, काठमाडौं । नेकपा (एमाले)का अध्यक्ष समेत रहेका संघीय सांसद केपी शर्मा ओलीले मंगलबार प्रतिनिधिसभाको जारी बैठकमा प्रधानमन्त्री पुष्पकमल दाहाल ‘प्रचण्ड’ले प्रस्तुत गरेका विश्वासको मत लिने प्रस्तावलाई समर्थन गरेका छन् ।

उनले आफू र आफ्नो पार्टीले सरकारलाइ विश्वासको मत दिने स्पष्ट पारेका छन् । सोही क्रममा उनले विश्वासको पक्षमा उभिन स्वतन्त्र सांसद लगायत संसदमा प्रतिनिधित्व गरिरहेका सबै दलसँग आग्रह गरे ।

उनले नेपाली कांग्रेसले सरकारलाई विश्वासको मत दिन गरेको निर्णयको स्वागत गर्दै कांग्रेसका सभापति समेत रहेका संसदीयका नेता शेरबहादुर देउवालाई धन्यवाद दिए । र, ठट्यौली शैलीमा देउवा र कांग्रेसको चर्चा गरे ।

बैठकमा उनीभन्दा पहिले बोलेका देउवाको नाम लिँदै ओलीले पटकपटक संसद विघटन गर्ने इतिहास कांग्रेसकोन नाममा दर्ज रहेको बताए । उनले आफूले संसद विघटन ताजा जनादेशका लागि गरिएको भन्दै बचाउ गरे ।

ओलीले देउवालाई अवसर अनुसार व्याख्या नगर्न र कांग्रेसले गरेको संसद विघटनको विगतका घटनातर्फ हेर्न आग्रह गरे । ‘माननीय शेरबहादुर देउवा जीले २०५९ साल असारमा संसद विघटन गरेर मध्यावधि गरेर आश्विन १८ र माघ १९ पुगेको होइन ?’ ओलीले थप प्रश्न गरे, ‘आफ्ना विगतका कार्यकालाई फर्के हेर्नुपर्दैन गुरु जी ?’