सरकार प्राकृतिक स्रोत साधनको दोहनमा उद्यत हुने संकेत देखिन्छः चित्रबहादुर केसी

२६ पुष, काठमाडौं । राष्ट्रिय जनमोर्चा नेपालका अध्यक्ष चित्रबहादुर केसीले संसदमा बलियो प्रतिपक्ष नहुँदा सरकार निरंकुश र स्वेच्छाचारी बन्ने बताएका छन् ।

मंगलबार संघीय संसदको बैठकमा प्रधानमन्त्री प्रचण्डले विश्वासको मत लिन पेश गरेको प्रस्तावमाथि दलको तर्फबाट धारणा राख्दै उनले सरकारलाई सबै दलले समर्थन गर्नु दरलाग्दो अवस्था देखा परेको बताए ।

चुनावमा करोडौं रुपैयाँ खर्च गरेर आएका सांसदहरु सरकारमा नगएसम्म उठाउन नसक्ने देखेरै सबै सांसद सरकारको पछि लागेको आरोप लगाए । साथै उनले चुनावमा उडाएको खर्च प्राकृतिक स्रोत साधनमाथि लुट नमच्चाएसम्म उठाउन नसक्ने भएकै कारण लुट मच्चाएर देश र जनतामाथि महंगी र ज्यादाति थोपर्न सरकारको समर्थनमा लागेको बताए । सरकार प्राकृतिक स्रोत साधनको दोहनमा उद्यत हुने संकेत देखिएकाे उनकाे भनाइ छ ।

उनले विश्वासको मत लिने क्रममा प्रम प्रचण्डले पेश गरेको सरकारको कार्यक्रम र मान्यता विगतकै निरन्तरता भएको बताए । उनले आफ्नो दल सरकारलाई विश्वासको मत दिननसक्ने बताउँदै प्रतिपक्षमा बस्ने बताए । सबै दल सरकार पक्ष बनेको देख्दा आफूलाई विचित्र लागेको बताए । सरकारले गर्ने गलत काम र निर्णयको विरोध गर्न प्रतिपक्षमा बस्ने निर्णय गरिएको उनले बताए ।