कानुन बनाएर रेशम चौधरीलाई रिहा गरिने प्रधानमन्त्रीको आश्वसन

२६ पुष, काठमाडौं । प्रधानमन्त्री पुष्पकमल दाहाल ‘प्रचण्ड’ले कानुन बनाएर रेशम चौधरी लगायत टिकापुर घटनामा जोडिएर जेलमा रहेका सबै बन्दीलाई मुक्त गरिने आश्वसन दिएका छन बताएका छन् ।

मंगलबार बसेको प्रतिनिधिसभामा आफूले राखेको विश्वासको मतको प्रस्तावमाथि उठेका प्रश्नको जवाफ दिँदै उनले पूर्ववर्ती सरकारले गरेका सम्झौता र सहमतिअनुुसार देशका विभिन्न स्थानमा भएका राजनीतिक संघर्षका क्रममा पक्राउ परेका वा जेल परेकालाई कानुन बनाएर रिहा गर्ने बताएका हुन् ।

रेशम चौधरी अन्यायमा परेको आफूले बताउँदै आएको स्मरण गराउँदै उनले चौधरीसहितलाई रिहा गर्न चाँडै विधेयक ल्याएर ऐन बनाउने जानकारी दिए ।

चौधरीकी श्रीमती सांसद रञ्जिता श्रेष्ठ अध्यक्ष रहेको नागरिक उन्मुक्ति पार्टीले ससर्त प्रधानमन्त्रीलाई विश्वासको मत दिने बताएकी छन् । उनले टिकापुर घटनाका राजबन्दी रिहाई र झुठा मुद्दा खारेज नभएसम्म सरकारमा नजाने बताएकी छन् ।