संसद बैठकः विश्वासको प्रस्तावमाथि मत विभाजन प्रक्रिया सुरु

२६ पुष, काठमाडौं । मंगलबार जारी प्रतिनिधिसभाको बैठकमा प्रधानमन्त्री पुष्पकमल दाहालले राखेको विश्वास मत लिने प्रस्तावमाथि मत विभाजन प्रक्रिया सुरु भएको छ ।

बैठकका अध्यक्ष पशुपति शमसेर जबराले दिएको ५ मिनेटको घण्टी बजाइसकिएको छ । अहिले प्रस्तावको पक्षम उभिएका दलका सांसदहरु सभामुखको दायाँपट्टि रहेको कक्षमा राखिएका दस्तखत संकलन पुस्तिका दस्तखत गर्ने क्रम जारी छ । मत विभाजनका आधारमा भोटिङ भइरहेको हाे ।

प्रस्तावको विपक्षमा उभिएका सांसदहरुलाई सभामुखको बायाँपट्टिको कक्षमा राखिएका पुस्तिकामा दस्तखद गर्ने व्यवस्था गरिएको छ । प्रचण्ड यही पुष १० मा प्रधानमन्त्रीमा नियुक्त भएका थिए । नियुक्त भएको ३० दिनभित्र संसदबाट विश्वासको मत लिनुपर्ने संवैधानिक व्यवस्था छ ।