संसदको अर्को बैठक माघ ५ गते, सभामुखका लागि निर्वाचन हुने

२६ पुष, काठमाडौं । प्रतिनिधिसभाको अर्को बैठक आगामी माघ ५ गते बस्ने भएको छ । मंगलबारको बैठकमा प्रधानमन्त्री पुष्पकमल दाहालले विश्वासको मत पाएको घोषणासँगै बैठक सकिएको थियो ।

बैठकका अध्यक्ष पशुपति शमसेर जबराले बैठक सकिएको जानकारी गराउँदै अर्को बैठक माघ ५ गते बिहान ११ बजे बस्ने घोषणा गरेका हुन् ।

आजको बैठक पेश गरिएको विश्वासको मत लिने प्रस्तावमा प्रम प्रचण्डले बैठकमा कायम रहेका २७५ मध्ये २६८ मत पाएका छन् । प्रस्तावको विपक्षमा जम्मा २ मत मात्र परेको छ ।

राष्ट्रिय जनमोर्चाका चित्रबहादुर केसी र नेपाल मजदपुर किसान पार्टीका सांसद प्रेम सुवालले विपक्षमा मत दिएका छन् । नेपाली कांग्रेसका सांसद टेकबहादुर गुरुङ भ्रष्टाचारी मुद्दामा र एमालेका लक्ष्मी प्रसाद महतो कोइरी कर्तव्य ज्यान मुद्दा खेपिरहेका कारण निलम्बनमा छन् । बाँकी एक जना पशुपति शमसेर जारी संसदका सबैभन्दा ज्येष्ठ सदस्य भएका कारण बैठकमा अध्यक्षको भूमिकामा छन् । स्वतन्त्र सांसद याेगेन्द्र मण्डल तटस्थ बसे ।

जारी संसद संविधान जारी भएपछि दोस्रो कार्यकाल हो । आजको बैठक पनि दोस्रो दिन हो । माघ ५ को बैठकले सभामुख र उपसभामुख चयन गर्ने तयारी रहेको छ ।

यसका लागि ३ माघमा सभामुख पदको निर्वाचन सूचना प्रकाशित गर्न संघीय संसद सचिवालयका महासचिव डा. भरतराज गौतमलाई अध्यक्ष जबराले निर्देशन दिएका छन् ।