सम्बन्धविच्छेद विकराल बन्दै, नागरिकतामा दोस्रो श्रीमानको नाम राख्ने बढे

२७ पुष, काठमाडौं । रोल्पामा दोस्रो श्रीमानको नामबाट नागरिकता लिने महिलाको संख्या बढ्दै गएका छन् । जिल्लामा सम्बन्धविच्छेदको संख्या बढेसँगै नागरिकतामा नाम फेर्नेको संख्या पनि बढेका हुन् । यसले सम्बन्ध विच्छेदले विकराल रूप लिँदै गएको बलियो संकेत दिएको छ ।

पहिलो श्रीमानबाट सम्बन्धविच्छेद गरेसँगै दोस्रो विवाह गर्ने महिलाहरू नेपाली नागरिकताको प्रमाणपत्रमा दोस्रो श्रीमानको नाम कायम गर्न जिल्ला प्रशासन कार्यालय धाउने गरेका छन् । जिप्रका रोल्पाका अनुसार अघिल्लो आर्थिक वर्ष पहिलो श्रीमानको नाम हटाइ दोस्रोको नाम कायम भई एक हजार आठ सय १० वटा नागरिकता जारी भएको थियो ।
सो वर्ष जिल्ला प्रशासन कार्यालय रोल्पाबाट कूल ७ हजार तीन सय ९४ वटा नयाँ नागरिकता जारी भएको थियो ।

अघिल्लो आर्थिक वर्षमा पहिलो श्रीमानको नाम हटाइ दोस्रोको नाम कायम भई १,८१० वटा नागरिकता जारी भएको थियाे ।

यसैगरी ३ हजार ३९ वटा प्रतिलिपि नागरिकता जारी भएको थियो । जिल्लामा वर्षभर जारी हुने प्रतिलिपि नागरिकतामध्ये करिब ६० प्रतिशत प्रतिलिपि नागरिकता पहिलो श्रीमानको नाम हटाइ दोस्रो श्रीमानको नाम कायम गर्ने गरी आउने गरेका छन् ।

‘जिल्लामा सानै उमेरमा विवाह गर्ने र उमेर पुगेसँगै सम्बन्धविच्छेद गर्ने मात्रा बढेसँगै स्थानीय तहको सिफारिससँगै नागरिकतामा पहिलो श्रीमान्को नाम हटाइ दोस्रो श्रीमानको नाम कायम गर्नेको संख्या पनि बढिरहेको छ’ प्रमुख जिल्ला अधिकारी नवराज सापकोटाले भने ।