कर्णालीमा एमाले र माओवादी केन्द्रबीच सरकार आलोपालो गर्ने सहमति

२७ पुष, सुर्खेत । कर्णाली प्रदेशमा नेकपा (माओवादी केन्द्र) र नेकपा (एमाले)बीच सरकारमा आलोपालो नेतृत्व गर्ने सहमति भएको छ ।

बुधबार मुख्यमन्त्रीका लागि दाबी पेस गर्नुअघि सत्तारुढ गठबन्धनका मुख्य दुई घटकबीच आलोपालो सरकारको नेतृत्वबारे सहमति भएको हो ।

एमाले र माओवादी केन्द्रबीच पूर्ण कार्यकालको आधा–आधा कार्यकाल सरकारको नेतृत्व गर्ने सहमति भएको माओवादी केन्द्रका कर्णाली प्रदेश इन्चार्ज कालीबहादुर मल्लले बताए । पहिलो अढाई वर्ष नेकपा (माओवादी केन्द्र)ले सरकारको नेतृत्व लिनेछ ।

माओवादी केन्द्रबाट राजकुमार शर्माले प्रदेश प्रमुखसमक्ष दाबी पेस गर्दैछन् । उनलाई मुख्यमन्त्रीको उम्मदवार बनाउने निर्णय माओवादी केन्द्रले गरिसकेको छ ।

एमालेले यमलाल कँडेललाई मुख्यमन्त्रीमा अघि सार्ने तयारी गरेको थियो ।