सुन लुटपाट गरेर फरार युवक जंगलबाट पक्राउ

२७ पुष, मन्थली । रामेछापको खाँडादेवी गाउँपालिका–७ बतासेमा दिउँसै एक महिलाको सुन लुटेर फरार भएका अभियुक्त युवकलाई प्रहरीले पक्राउ गरेको छ ।

मंगलबार बिहान करिब ११ बजे खाँडादेवी गाउँपालिका–बतासेकी ३५ वर्षीया सिता मगरको घरैबाट अपरिचित युवकले पछाडिबाट आक्रमण गरी दुवै कानको सुनको रिङ थुतेर फरार भएपछि खोजीका क्रममा पक्राउ गरिएको हो ।

पक्राउ पर्नेमा सुनापति गाउँपालिका–३ हिलेदेवी २४ वर्षीय सोमबहादुर तामाङ रहेको जिल्ला प्रहरी कार्यालयले जनाएको छ । उनलाई गाल्वाबाट खटिएको प्रहरीको टोलीले सोही गाउँपालिका–२ स्थित फलामेपोखरी सामुदायिक जंगलमा लुकिछिपी बसिरहेको अवस्थामा पक्राउ गरिएको हो ।

अभियुक्त तामाङको साथबाट लुटिएका सुनको रिङ समेत बरामद भएको प्रहरीले जनाएको छ । निजमाथि आवश्यक अनुसन्धान भइरहेको जनाइएको छ ।