देउवाले बोलाए धुम्बाराहीमा शीर्ष नेतासहित पदाधिकारीको आकस्मिक बैठक

२८ पुष, काठमााडौं । नेपाली कांग्रेसका सभापति शेरबहादुर देउवाले धुम्बाराही निवासमा शीर्ष नेताहरुसहित पदाधिकारीको आकस्मिक बैठक बोलाएका छन् । प्रतिपक्षमै बस्ने गरी सरकारलाई विश्वासको मत दिएको विषयले कांग्रेसमा तीव्र असन्तुष्टि फैलिएका बेला सभापति देउवाले आकस्मिक रुपमा पदाधिकारी बैठक बोलाएका हुन् ।

प्रधानमन्त्री पुष्पकमल दाहाल प्रचण्डलाई विश्वासको मत दिइएको विषयले कांग्रेसमा संस्थापनइतर समूहका दोस्रो तहका नेताहरू असन्तुष्ट बनेर आलोचना गरिहेको बेला देउवाले पदाधिकारीमा नभएका नेताहरुलाई पनि बोलाएको बताइएको छ । बिहीबार दिउँसो आफ्नो निवास धुम्बाराहीमा बस्ने गरी देउवाले पदाधिकारी बैठक बोलाएको कांग्रेस मुख्यसचिव कृष्णप्रसाद पौडेलले जानकारी दिए ।

पदाधिकारी बैठकमा देउवाले पार्टीका शीर्ष नेताहरूलाई समेत आमन्त्रण गरेका छन् । कांग्रेसको केन्द्रीय समिति बैठक १५ माघमा सारिएको छ । पहिले २२ पुस र २८ पुसमा बस्ने भनिएको बैठक माघमा सारिएको हो । कांग्रेसले प्रधानमन्त्री पुष्पकमल दाहाल प्रचण्डलाई विश्वासको मत दिएर प्रतिपक्षमा बस्ने निर्णय गरेपछि चौतर्फी आलोचना भएको छ ।

आलोचनाकै बीचमा कांग्रेसले माओवादीका अध्यक्ष पुष्पकमल दाहाल प्रचण्डलाई समर्थन गर्नुको कारणबारे जानकारी दिन पदाधिकारी बैठक बोलाइएको हुनसक्ने अनुमान गरिएको छ । आगामी ५ माघमा प्रतिनिधिसभाको सभामुखको निर्वाचनमा कसलाई उम्मेदवार बनाउने भन्ने विषयमा पनि छलफल हुने बताइएको छ ।