शिक्षक विष्ट हत्याका अभियुक्त दम्पती जेल चलान

२८ पुष, बैतडी । बैतडीको पाटन नगरपालिका–६ स्थित श्रीकृष्ण माविका शिक्षक धनबहादुर विष्टको हत्यामा संलग्नताको आरोपमा प्रहरी हिरासतमा रहेका एक दम्पतीलाई कारागार चलान गरिएको छ ।

जिल्ला अदालतको आदेशमा मुद्दा पुर्पक्षका लागि पुचौडी नगरपालिका–३ का प्रजा बोहरा र उनकी श्रीमती बिमलालाई जनेल पठाइएको हो ।

सुर्नया गाउँपालिका-२ घर भएका ५५ वर्षीय शिक्षक यही पुस २ गते श्रीकृष्ण माविको छात्रावास पछाडी मृतावस्थामा भेटिएका थिए । त्यसपछि शिक्षकको हत्यामा संलग्न रहेको आरोपमा बोहरा दम्पतीलाई प्रहरीले पक्राउ गरेर अनुसन्धान पश्चात कर्तव्य ज्यान कसुरमा मुद्दा चलाइएको थियो ।

अनुसन्धानका क्रममा बोहरा दम्पतीले हत्या गरेको स्वीकारेको प्रहरीको दाबी छ । शिक्षक विष्ट पुष २ गते श्रीकृष्ण माविको छात्रावास पछाडी मृत फेला परेका थिए ।

‘पुस १ गते राति विमला शौचालय जान्छु भनि कोठाबाट बाहिर निस्केकी थिइ । ढिलोसम्म नआएपछि मैले खोजी गर्दा उनलाई विष्टले अंगालो हालेको देखेपछि रिस उठेर मुक्का हानेको थिएँ,’ अभियुक्त बोहराले बयानमा भनेका थिए । ढलेपछि पनि उनले छाती र मुखमा हानेको बयान दिएकाे प्रहरीले बताउँदै आएकाे छ ।