कांग्रेसले विश्वासको मत दिनुको कारण विस्तारै पुष्टि हुन्छः डा. शेखर

२८ पुष, मोरङ । नेपाली कांग्रेसका नेता डा. शेखर कोइरालाले नेकपा माओवादीका अध्यक्ष पुष्पकमल दाहाल नेतृत्वको सरकारलाई विश्वासको मत दिनुको कारण विस्तारै पुष्टि हुँदै जाने भएका छन् । उनले कांग्रेस सभापति शेरबहादुर देउवा र प्रधानमन्त्री पुष्पकमल दाहाल ‘प्रचण्ड’बीच कुनै सहमति नभए पनि कांग्रेसले किन विश्वासको मत दियो भन्ने कुरा समयले पुष्टि गर्ने बताएका छन् ।

बिहीबार विराटनगर विमानस्थलमा सञ्चारकर्मीसँग कुरा गर्दै डा कोइरालाले सभापति देउवा र प्रधानमन्त्री प्रचण्डबीच कुनै सहमति भएको जानकारी आफुलाई नभएको बताए । उनले देउवा र प्रचण्डबीच कुनै लेनदेनका विषयमा सहमति भएर मात्र कांग्रेस विश्वासको मत नदिएको भन्दै किन दियो भन्ने कुराको पुष्टि पछि हुने र अहिलेलाई कांग्रेस तिपक्ष्ँमा नै बस्ने बताए ।

कोइरालाले अहिले अरु चुनाव सकिए पनि बाँकिरहेका चुनावमा सहकार्य हुनसक्ने बताए । उनले बाँकीरहेका सबै पदमा कांग्रेसले उम्मेदवारी दिने बताए । अहिले सहयोगको अपेक्षा गरेर सरकारलाई विश्वासको मत नदिएको दोहोर्याउदै कोइरालाले भविश्वले नै सबै कुरा बताउँने दावी गरे । उनले नेकपा माओवादी र कांग्रेसबीच सहकार्य हुने र नहुने विषय पनि भविश्यले नै निर्धारण गर्ने बताए ।

डा. कोइरालाले कांग्रेसले प्रधानमन्त्रीलाई विश्वासको मत दिए पनि प्रतिपक्षको भूमिका नछोड्ने दोहोर्याए । कानुनका विज्ञहरूसँग छलफल गरेर नै कांग्रेसले प्रतिपक्षमा बसेर प्रधानमन्त्रीलाई विश्वासको मत दिएको उनको भनाइ छ । उनले भने,‘कांग्रेसमा दुईवटा विचार आएका थिए । एउटा, प्रधानमन्त्रीलाई विश्वासको मत हाल्ने, अर्को, विपक्षमा भोट हाल्ने । मलाई के लाग्यो भने यो विषयलाई लिएर विभाजित हुनु हुन्न, तटस्थ बसौँ भन्ने प्रस्ताव राखेको थिएँ । तर, त्यसलाई मानिएन । पार्टीको निर्णय मैले माने ।’

उनले प्रतिपक्षमा बस्न मिल्छ भनेर नै भोट हालेको भन्दै कांग्रेस सरकारमा पनि सहभागी नहुने स्पष्ट पारे । संसद् विघटनलाई प्रधानमन्त्रीको अधिकार भन्ने विषय विश्वभर नै परिवर्तन भएको भन्दै उनले अब संसद् विघटन प्रधानमन्त्रीको अधिकारका रूपमा नरहेको बताए । उनले भने, ‘संसदीय व्यवस्थाको जननी राष्ट्र भनेको ब्रिटेन हो । त्यहाँ के भनिन्थ्यो भने प्रधानमन्त्रीको सबभन्दा बलियो हतियार भनेको पार्लियामेन्ट डिजल्भ गरेर फ्रेस मेन्डेट लिने हो । तर, ब्रिटेनले नै खारेज गरिसक्यो । त्यसकारण विघटन अब प्रधानमन्त्रीको अधिकार रहेन । धेरै कुरा परिवर्तन भइसकेको छ । प्रतिपक्षमा बस्नेले विश्वासको मत दिनु नै गलत भन्ने हुँदैन ।’

राष्ट्रपति र उपराष्ट्रपतिको निर्वाचनमा प्रदेशका सांसदले पनि भोट हाल्ने भएकाले यो सबैलाई विचार गरेर कांग्रेसले विश्वासको मतमा भोट हालेको बताए । नेता कोइरालाले ती निर्वाचनमा माओवादीले कांग्रेसका उम्मेदवारलाई साथ दिने ग्यारेन्टी नभएको, तर पार्टीले मतको आशा भने गर्न पाउने बताए । उनले यसबारे माओवादीले पनि विचार गरेकै हुनुपर्ने बताए ।