उपप्रधानमन्त्रीसहित राप्रपा सरकारमा जाने सहमति भएको छैनः प्रवक्ता श्रेष्ठ

२९ पुष, काठमाडौं । राष्ट्रिय प्रजातन्त्र पार्टीका प्रवक्ता मोहन श्रेष्ठले उपप्रधानमन्त्रीसहित तीन मन्त्रालय लिएर राप्रपा सरकारमा जाने विषयमा कुनै पनि सहमति नभएको बताएका छन् । उनले नेकपा माओवादीका अध्यक्ष पुष्पकमल दाहाल ‘प्रचण्ड’ नेतृत्वको सरकारलाई समर्थन दिएपनि अहिलेसम्म प्रधानमन्त्री प्रचण्ड र नेकपा एमालेका अध्यक्ष केपी शर्मा ओलीसँग यो विषयमा सहमति नभएको बताएका छन् ।

नेपालबहससँग कुरा गर्दै प्रवक्ता श्रेष्ठले पार्टीमा सरकारमा जानुपर्ने र जान नहुने मत बराबर रहेको भन्दै हामीले राखेका केही माग सरकारका साझा कार्यक्रममा सम्बोधन भएपनि सरकारबारे कुनै सहमति नभएको दावी गरे । सत्तारुढ दलबीचत सहमति भएपनि पार्टीका तर्फबाट अध्यक्ष राजेन्द्र लिङ्देन वा अरु कसैले नेतृत्व गर्ने भन्नेबारे पनि निर्णय नभएको उनले बताए ।

प्रवक्ता श्रेष्ठले मन्त्रिपरिषद् विस्तारबारे हुने छलफलमा राप्रपालाई यसअघिका छलफलमा नबोलाइएको भन्दै मन्त्रिपरिषद विस्तारमा अझै केहिदिन लाग्ने सूचना आफुले पाएको बताए । उनले राप्रपाका केही मान्यता फरक रहेकाले ति विषयहरुमा सहमति भएपछि मात्रै सरकारमा जाने कुरामा छलफल हुने बताए । प्रधानमन्त्री प्रचण्ड र एमाले अध्यक्ष केपी शर्मा ओलीबीच बुधबार र बिहीबार भएको मन्त्रालय भागबन्डासम्बन्धी छलफलबारे राप्रपालाई जानकारी नआएको उनको भनाइ छ ।

उनले भने, ‘उहाँहरुबीच भागबन्डाबारे मोटामोटी सहमति भएको होला र सो सहमतिलाई गठबन्धन बैठकबाट अन्तिम रूप दिने तयारी पनि भएको होला तर, हामीलाई जानकारी छैन् । सरकारमा जाने र मन्त्रालयाकाबारे हामीसँग छलफल भएको छैन् । पार्टीको कार्यसम्पादन समितिको जे कुरा भएको थियो अहिलेसम्म राप्रपा त्यसैमा सीमित छ ।’

राप्रपाको माग अनुसार नै सरकारले पृथ्वी जयन्तीमा बिदा दिएको थियो भने भ्रष्टाचार र सार्वजनिक सेवा प्रवाहलगायतका विषयमा पनि नीति तथा कार्यक्रममा प्राथमिकता दिइएको छ । १४ सिट रहेको राप्रपाबाट सरकारमा जाने सहमति भए को–को मन्त्री बन्ने भन्नेबारेमा पार्टीमा छलफल गरेर अन्तिम निर्णय लिनसमेत बाँकी रहेको प्रवक्ताश्रेष्ठले बताए । पुस १० गते प्रचण्डले १७० सांसदको हस्ताक्षरसहित राष्ट्रपतिसमक्ष प्रधानमन्त्रीमा दाबी पेस गर्दा राप्रपाले पनि समर्थन गरेको थियो ।