नेतृत्व परिवर्तन नगरेसम्म राजनीतिक स्थायित्व सम्भव छैनः महामन्त्री थापा

३० पुष, काठमाडौं । नेपाली कांग्रेसका महामन्त्री गगन कुमार थापाले नेपालमा राजनीतिक स्थायित्व र आर्थिक विकासका लागि सबैभन्दा पहिले नेतृत्व परिवर्तन गर्न आवश्यक भएको बताएका छन् । उनले अहिले दल र देशको नेतृत्व गरिरहेका नेताहरु नेतृत्वमा रहेसम्म राजनीतिका स्थायित्वको कल्पनासम्म गर्न नसकिने बताएका छन् ।

रामकृष्ण भण्डारीद्वारा लिखित ‘सत्ता संघर्षः ३० वर्षमा २८ सरकारका नालिबेली’ पुस्तक सार्वजनिक तथा अन्तरसंवाद कार्यक्रममा महामन्त्री थापाले नेपालको राजनीतिलाई तीन पूर्वप्रधानमन्त्रीले खेलको अखडा बनाएर एकले अर्कालाई पर्छाने काम गरिरहेको बताए । अहिलेको नेतृत्व सत्ता प्राप्तिका लागि जुनसुकै सम्झौता गर्न पनि तयार रहेको उनको दावी थियो।

थापाले राजनीतिको नेतृत्व परिवर्तन हुन नसक्दा आम नेपाली र सिंगो देशले समस्या भोगिरहनुपरेको दाबी गरे । उनले कांग्रेसमा मात्र नभएर अरु दलमा पनि यही नेतृत्व रहेसम्म र उनीहरुलाई ताला चाबी दिएसम्म देश यस्तै खिचातानीमा चलिरहने बताए । नेताहरु देशको आवश्यकता र जनताको चाहनाभन्दा व्यक्तिवादी र स्वर्थको सीमाभन्दा बाहिर आउन नसकेको बताए ।

थापाले भने,‘ अहिले नेपालको राजनीतिमा तीन पूर्वप्रधानमन्त्रीहरुले गेम खेलिरहनुभएको छ । कहिले, कसले, कसलाई र कसरी पछार्ने भन्ने । त्यसले गर्दा नेपालको राजनीति यतिबेला तीन भूतपूर्व प्रधानमन्त्रीको अखडा जस्तो भएको छ । आइतबार एउटा भूतपूर्वले अर्कोलाई पछार्नु भयो । सोमबार अर्को भूतपूर्वले अर्कोलाई । मंसिर ४ देखि यहाँसम्म आइपुग्दा कुन भूतपूर्व प्रधानमन्त्रीले कुन भूतपूर्व प्रधानमन्त्रीलाई फल हान्यो भन्ने मात्रै देखिन्छ । देश र जनताका बारेमा उहाँहरुको ध्यान छैन् ।’

उनले पार्टी र सत्तामाथि नेताहरूले कब्जा जमाएर बसेको आरोप लगाए । नेताले नीति नमान्ने भएकाले एक ठाउँमा नभएर हरेक ठाउँमा समस्या भइरहेको थापाको भनाइ छ । राजनीति सत्ताका लागि हो भनिने तर प्रश्न सत्ता केका लागि भन्ने स्पष्ट नभएको उनको भनाइ छ । महाकालीदेखि एमसीसीसम्म सत्ता प्राप्तिमा मिल्ने र प्राप्त भएपछि फरक व्याख्यामा उत्रने नेताहरुको व्यवहार अब अति भइसकेको बताए ।

बहुदलीय र संसदीय व्यवस्थामा खेल खेल्दा नियमभित्र बसेर नखेलिएको र संस्था बलियो बन्न नदिँदा समस्त प्रणालीले सही काम गर्न नसकेको उनको भनाइ छ । मुलुकको राजनीतिक अवस्था छिनछिनमा बदलिइरहेको भन्दै थापाले भने, ’कुन भूतपूर्व प्रधानमन्त्रीले कुन भूतपूर्व प्रधानमन्त्रीलाई छिर्के हान्छ भन्ने भर नै छैन ।’