२५ वर्षे व्यवसायिक यात्रामा यतीका १४ विमान परे दुर्घटनामा

१ माघ, काठमाडौं । आइतबार पोखरामा भएको दुर्घटना यती एयरलान्सको कम्पनीको १४ औँ दुर्घटना हो । यसअघि उसका १३ वटा विमान दुर्घटनामा परेका छन् । काठमाडौंबाट पोखराका लागि उडेको यती एयरको विमान दुर्घटना यती समूहको २५ वर्षयता भएको १४ औं हवाई दुर्घटना भएका नेपाल नागरिक उड्डयन प्राधिकरणले जनाएको छ । प्राधिकारणले हवाइ दुर्घटनाबारे रेकर्ड राख्दै आएको छ ।

दुईवटा टुइनअटर विमानबाट २०५५ जेठमा स्थापना भएको यती एयरलायन्सले २५ वर्षयता आफ्ना दुई जना सञ्चालक दाजुभाइसहित १३ वटा हवाई दुर्घटनामा चालकदलका सदस्य र यात्रुसहित १३० जनाभन्दा बढीले ज्यान गुमाइसकेका छन् । धेरै हवाइ दुर्घटना बेहोर्नु परेपछि यतीले दुर्गम उडानका लागिभन्दै १३ वर्षअघि अर्को कम्पनी तारा एयर स्थापना गरेको थियो । तारा स्थापना भएयता ६ वटा दुर्घटना भइसकेका छन् ।

२४ वर्षयता यती र दुर्गम उडानका लागि स्थापना गरिएको सहायक कम्पनी तारा एयरसमेत गरी पर्यटन व्यवसायी लाक्पा सोनाम शेर्पाको कम्पनीले १४ वटा हवाई दुर्घटना बेहोरिसकेको छ । कुल १४ वटा घटनामा यती समूहले आफ्नै कम्पनीका विमानमा मानवीय क्षति भएका ७ वटा दुर्घटना बेहोरिसकेको छ । यसमा तीनवटा तारा र चारवटा यतीसँग सम्बन्धित छन् । बाँकी ७ वटा घटनामा यात्रु घाइते भए पनि कुनै मानवीय क्षति भने भएको छैन् ।

कुल १४ वटा घटनामा दुर्गम तथा हिमाली भेगमा मात्रै यो समूहले ११ वटा घटना बेहोरिसकेको छ । अधिकांश दुर्घटनामा यती समूहले वरिष्ठ तथा विज्ञ पाइलटहरू गुमाएको तथ्यांकमा देखिन्छ । बिहान साढे १० बजे काठमाडौंबाट पोखराका लागि उडेको ९ एन–एएनसी विमान पोखरा अन्तर्राष्ट्रिय विमानस्थलमा अवतरण गर्ने क्रममा पुरानो एअरपोर्ट र नयाँ एअरपोर्टको बीचमा रहेको नयाँगाउँस्थित सेतीको खोंचमा दुर्घटनामा परेको थियो ।

दुर्घटनामा पर्ने यतिको उक्त विमान पोखराको अन्तर्राष्ट्रिय विमानस्थलमा पहिलोपटक अवतरण गर्ने विमान थियो । उक्त विमानलाई यति एयरलाइन्सका वरिष्ठ क्याप्टेन कमल केसीले उडाएका थिए । क्याप्टेन केसी प्रशिक्षक पाइलट पनि हुन् । यही विमानबाट पोखरा अन्तर्राष्ट्रिय विमानस्थलमा पहिलो डेमो उडान गरेका थिए । नेपालमा ७२ यात्रु क्षमताको एटीआर विमान दुर्घटना भएको यो पहिलो घटना हो ।

नागरिक उड्डयन प्राधिकरणद्वारा जारी एभिएसन सेफ्टी रिपोर्ट अनुसार पोखरामा व्यवसायिक उडान अन्तर्गत भएको यो दोस्रो दुर्घटना हो । यसअघि ०५९ भदौ ६ गते सांग्रिला एयरको ट्वीनअटर दुर्घटना हुँदा चालक दलका सदस्यसहित १८ जनाको मृत्यु भएको थियो । आज भएको दुर्घटनामा अहिलेसम्म ३ जना जीवित भेटिएका छन् ।