गुणका राजेन्द्रको धन्दाः कर्जा तिर्न आनाकानी, पत्रकार तगारो ?

१ माघ, काठमाडौं । गुण ग्रूपलाई चिनाउनु पर्दा राजधानीमा फैलिएको थुप्रै व्यवसायको छाताघर भन्दा फरक नपर्ला । त्यसका सञ्चालक राजेन्द्र शाक्य आर्थिक रुपमा झण्डै डुबिसकेर फेरि उत्रिँदै गरेका एक व्यवसायी हुन् । विगतमा उनका व्यवसायिक क्रियाकलाप त्यति विवादमा नतानिए पनि पछिल्लो समय भने केही विवादमा अल्झेको जस्तो देखिन्छ । रियल स्टेटदेखि हाउजीड्गसम्म, सहकारीदेखि अस्पतालसम्म, कन्ट्रक्सन कम्पनीदेखि इन्जीनियरिड्ग कलेजसम्म, होटलदेखि हाइड्रोसम्म, टेलिभिजनदेखि फिल्मसम्म, एअरलाइन्सको व्यवसायदेखि सेवकसम्म उनको प्रत्यक्ष-अप्रत्यक्ष चासोमै दैनिकी बित्छ ।

१९८४ मा गुण ज्वेलर्सबाट सुरु भएको राजेन्द्र शाक्यको व्यवसायिक तीब्रता झण्डै ४ दशकसम्म आईपुग्दा दर्जन बढी पुगिसकेको अवस्था छ । आर्थिक दायित्वको कुरा गर्नु पर्दा यस बीचमा शाक्यले निकै उतार चढाव भोगिसकेका छन् । झण्डै-झण्डै डुबीसकेका उनी उत्रिसकेको नभएपनि उत्रने तरखरमा भने देखिन्छन् । तर, डुब्नै लागेका उनी उत्रने कार्यमा भने केही व्यवसायिक मर्यादा उल्लंघन गर्दै अघि बढीरहेको बताइन्छ । यसका लागि उनले आफ्नै लगानी रहेको आफ्नै लगानीको मिडियाका प्रस्तोता समेत रहेका हर्ताकर्ता पत्रकारलाई प्रयोगमा लिएको बताइन्छ ।

आर्थिक रुपमा धराशायी हुँदै गर्दा त्यसबेला विमानस्थलको डम्पीड्ग साइटमा थन्क्याइनु पर्ने गुण एअरलाइन्सका जहाज केही समय सिम्रिक एअरलाइन्सका नामबाट पनि उडान भरिएको थियो भने गुण को-अपरेटीभको बचतकर्ताको निक्षेप फिर्ता गर्न नसक्दाको अवस्था त्यस्तै थियो । गुण कोलोनी, गुण सिनेमाको पनि कुरै नगरौं । यतिबेला विगतमा लिएको कर्जाको सावाँ त परैको कुरा व्याजसमेत तिर्न आनाकानी गर्दैछन्, चर्चित व्यवसायी राजेन्द्र शाक्य । उनलाई प्रत्यक्ष-अप्रत्यक्ष सघाउँदै छन् हर्ताकर्ता पत्रकार । जुनजुन बैंकबाट कर्जा लिइएको छ, त्यो बैंकका सीईओ र राष्ट्र बैंकका प्रभावकारी अधिकारी समेतलाई प्रभाव वा दबाबमा पार्ने कार्य ती पत्रकारले गरिरहेको स्रोतले बतायो ।

बैंकको कर्जा समयमै तिर्न आनाकानी गर्ने, उक्त विषयलाई अन्यत्रै मोड्न पत्रकार तगारो बन्न थालेपछि यतिबेला बैंकका सीईओहरु समेत अफ्ठ्यारोको कसीमा दलिनु परेको बताइएको छ । थुप्रै व्यवसायमा हात हालेका शाक्यले विभिन्न बैंक तथा वित्तीय संस्थाबाट उस्तै गरी कर्जा समेत लिएको अवस्था छ । त्यही कर्जाको सावाँव्याज समयमा तिर्नु भन्दा आफ्नै कम्पनी मध्येको एक सिनियर पत्रकारको प्रभावलाई अघि बढाउन चाहेको देखिएको हो ।

नाम र पहिचान नखुलाउने शर्तमा एक बैंकरले गुनासो गरेः व्यवसायीले बैंकबाट कर्जा लिएर व्यवसायमा लगाउनु यो एउटा प्रकृया नै हो तर बैंकलाई तिर्नु बुझाउनु पर्ने साँवाव्याजमा आफ्नो संस्था र पत्रकारको प्रभाव देखाउन खोज्नु गलत हो । यसले पत्रकारको दोहोरो चरित्रसँगै ऋणी, व्यवसायी र बैंक बीचको सम्वन्धलाई खलल पुर्याउँछ । आफ्नो जागिरे संस्थाकै मालिकलाई सहयोग गर्ने हेतुले जाने बुझेरै वा प्रभाव, प्रलोभन परेर एउटा सिनियर पत्रकार अघि बढेका हुन् ? त्यो भने थाहा हुन सकेन ।