उद्धार टोलीले दुर्घटना क्षेत्र सेती खोंचबाट ६५ जनाको शव निकाल्यो

१ माघ, पोखरा । पोखराको सेती खोंचमा दुर्घटना भएको यती एयरलाइन्सको विमानबाट ६५ जनाको शव बाहिर निकालिएको छ । थपको खोजीकार्य जारी छ । शव खोज्न विभिन्न समूहमा उद्धार टोली खटाइएको छ । अहिलेसम्म दुर्घटनाग्रस्त क्षेत्रबाट ६५ जनाको शव भेटिएको खोज तथा समन्वय केन्द्रले जनाएको छ ।

नेपाल नागरिक उड्ययन प्राधिकरणको खोज तथा उद्धार समन्वय केन्द्रले दिएको जानकारीअनुसार बिहान साढे १० बजे पोखराका लागि काठमाडौंबाट उडेको जहाज दुर्घटनामा परेको विमानबाट उक्त शव निकालिएको हो । विमानमा ५३ जना नेपाली, पाँच भारतीय, रसियन ४, आयरल्यान्डका एक, अस्ट्रेलियन नागरिक १, अर्जेन्टिनी नागरिक एक, कोरियन २, फ्रान्सेली १ गरी जम्मा ६८ यात्रु रहेका थिए ।

चालक दलका सदस्य चारजना रहेको प्राधिकरणले जनाएको छ । १० बजेर ५० मिनेट जाँदा जहाज सेती खोँचमा दुर्घटनान परेको थियो । विमानमा चालक दलका सदस्य ४ जना, महिला २५, पुरुष ३७, ३ बालक र ३ शिशु रहेका थिए ।

जहाजमा रहेका ७२ जनामध्ये अहिलेसम्म ६५ जनाको शव फेला परेको हो । बाँकीको जीवित उद्धार सम्भावना टरेको कास्कीका प्रमुख जिल्ला अधिकारी टेकबहादुर केसीले बताएका छन् । उनले जीवितै उद्धार गरिएकाको पनि अस्पताल नपुग्दै मृत्यु भएको थियो ।