मोटरसाइकल पुलबाट खस्दा २ जनाको मृत्यु, १ गम्भीर घाइते

२ माघ, कलैया । बारामा ३ जना सवार मोटरसाईकल दुर्घटना हुँदा २ जनाको मृत्यु भएको छ । मोटरसाइकलमा सवार अन्य एक जना घाइते भएका छन् । सिम्रौनगढ नगरपालिका-१ बैरिया बस्ने २३ वर्षीय कासिम अन्सारी र २२ वर्षीय तहिद अन्सारीको मृत्यु भएको हो ।

उनीहरु दुवै जनाको शव खोजतलासको क्रममा थलही खोलामा भेटिएको जिल्ला प्रहरी कार्यालय बाराले जनाएको छ ।
दुर्घटनामा बैरियाकै २२ वर्षीय गुड्डु अंसारी गम्भीर घाइते छन् । उनीहरु तीनै जना एउटै मोटरसाईकलमा सवार थिए ।

आइतबार राति ९ बजे महागढीमाई नगरपालिका–९ थलही पुलमा गढीमाईबाट श्रीनगरतर्फ जाँदै गरेको ना. २६ प. २२९५ नम्बरको पल्सर मोटरसाइकल अनियन्त्रित भई पुलबाट खसेको थियो ।

प्रहरीले भने दुर्घटनाको खबर सोमबार बिहान मात्र पाएको थियो । मोटरसाईकल थलही खोलामा नै भेटिएको थियो ।
खोजतलासको क्रममा कासिमलाई बिहान ९ बजे घटनास्थल भन्दा २ किलोमिटर दक्षिणतर्फ खोला किनारमा घोप्टो परेर मृत अवस्थामा फेला परेको प्रहरीले जनाएको छ ।

त्यसैगरी तहिदको शव दिउँसो १२ बजे पुलभन्दा १ सय मिटर दक्षिणतर्फ खोलाको मध्य भागमा भेटिएको जिल्ला प्रहरी कार्यालय बाराले जनाएको छ ।

यसअघि गएको पुस ४ गते राति बाराबाट चन्द्रनिगाहपुर गइरहेको ३ जना सवार मोटरसाइकल धन्सार पुलनजिक सडकमा रोकराखेको ट्रकमा ठोक्किदाँ २ जनाको घटनास्थलमै मृत्यु भएको थियो । एक जना सामान्य घाइते भएका थिए । घाइते सामान्य उपचारपछि घर फर्किएका थियो । घाइतेले नै घरमा मोटरसाइकल दुर्घटनामा परेको खबर गरेका थिए । मृतक रौतहट सिम्रीका थिए ।