लक्ष्यको ३२.७१ प्रतिशत मात्र राजस्व संकलन, पुषमा उठ्यो १ खर्ब २९ अर्ब

२ माघ, काठमाडौं । सरकारले चालु आर्थिक वर्ष २०७९÷८० को पहिलो ६ महिनामा लक्ष्यको ३२।७१ प्रतिशत मात्र राजस्व संकलन गर्न सकेको देखिएको छ । यसमा सबैभन्दा धेरै संकलन पुष महिनामा उठेको राजश्व रहेको छ ।

महालेखा नियन्त्रक कार्यालयका अनुसार पुस महिनामा मात्र १ खर्ब २९ अर्ब रुपैयाँ राजस्व संकलन भएको छ । पुष महिना आयकरको पहिलो किस्ता बुझाउने महिना समेत भएको संकलनमा सुधार आएको हो ।

पुष मसान्तसम्म ४ खर्ब ५८ अर्ब ९८ करोड रुपैयाँ राजस्व संकलन भएको छ । यस आवमा सरकारले १४ खर्ब ३ अर्ब रुपैयाँ राजस्वबाट संकलन गर्ने लक्ष्य राखेको छ ।

यस्तै, पुष मसान्तसम्म सरकारको आम्दानी भन्दा खर्च सवा खर्बले बढी देखिएको महालेखाको तथ्यांकले देखाउँछ । यस अवधिमा सरकारको खर्च ५ खर्ब ७६ अर्ब ३४ करोड रुपैयाँ भएको छ भने आम्दानी ४ खर्ब ९४ अर्ब ८४ करोड रुपैयाँ भएको छ ।

६ महिनाको अवधिमा पूँजीगत प्रकृतिको खर्च मात्र ५३ अर्ब ४५ करोड रुपैयाँ मात्र भएको छ । यो कुल पूँजीगत खर्च गर्ने लक्ष्यको मात्र १४.०४ प्रतिशत हो । तर, चालु खर्च भने ४ खर्ब ५५ अर्ब १२ करोड रुपैयाँ भएको छ ।