एमालेले ८ मन्त्रालय पाउँदा राप्रपालाई २, लोसपाकाे भागमा १ मन्त्रालय

२ माघ, काठमाडौं । सत्तारुढ दलहरुबीच मन्त्रालय भागबण्डा टुंगिएको छ । प्रधानमन्त्री एवं माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा (एमाले) अध्यक्ष केपी शर्मा ओलीबीच सोमबार ओलीको घरमा करिब ५ घण्टा लामो वार्तामा मन्त्रालय भागवण्डा लगभग टुंगिएको हो ।

सहमतिअनुसार एमालेले ८ वटा मन्त्रालय पाउने भएको छ । सरकारको नेतृत्व गरिरहेको माओवादी केन्द्रले ४ र राप्रपाले २ मन्त्रालय पाउने भएका छन् । यस अतिरिक्त एमालेले २ राज्यमन्त्री र माओवादी केन्द्रले १ राज्यमन्त्री लिनेछन् ।

रास्वपालाई ३ र राप्रपालाई २ मन्त्रालय दिने सहमति भएको स्रोतको दाबी छ । जसपाले २ मन्त्रालय पाउने भएको छ भने १ मन्त्रालय दिएर लोसपालाई सरकारमा ल्याउन पहल गर्ने सहमति भएको छ । जनमत र नागरिक उन्मुक्ति पार्टीलाई एक एक मन्त्रालय दिन सहमति जुटेको छ ।

७ दलको समर्थनमा बनेको सरकारमा एमाले सबैभन्दा ठूलो दल, माओवादी केन्द्र दोस्रो र रास्वपा तेस्रो दल हुन् । नागरिक उन्मुक्ति भने टीकापुर घटनाका थुनामा राखिएका बन्दी र लगाइएका मुद्दा खारेज नभएसम्म सरकारमा नजाने अताउँदै आइरहेको छ ।