शक्तिको उचित बाँडफाँड भए मात्र जसपा सरकारमा जाने

२ माघ, काठमाडौँ । जनता समाजवादी पार्टी (जसपा)ले सरकारमा सहभागी हुन विभिन्न सर्त अगाडि सारेको छ । उसले सरकारमा सहभागी हुन सत्ता र शक्तिको उचित बाँडफाँट हुनुपर्ने सर्त सारेको छ ।

न्यायोचित तथा सम्मानजनक अवस्था भएमा मात्र सरकारमा सहभागिता हुने जसपाका नेताहरुले बताएका छन् । निर्वाचनको परिणामले संयुक्त सरकारको गठनको आधार तय गरेको उनीहरुको भनाइ छ ।

सरकारका दुई ठूलो पार्टी एमाले र माओवादी केन्द्रका अध्यक्षबीच सोमबार मात्र जसपालाई दुई वटा मन्त्रालय दिएर जान सकिने भनेर भएको सहमतिकै दिन जसपाले यस्तो सर्त सारेको हो ।

सरकारले ल्याएको न्यनुतम साझा नीति तथा कार्यक्रम र सत्ता शक्तिको बाँडफाँडमा हुने सहमति र समझदारीको आधारमा मात्र पार्टीको सहभागी हुन सक्ने प्रचार विभाग प्रमुख पूर्ण बस्नेत बताए ।

जसपाका अध्यक्ष उपेन्द्र यादव भने निर्वाचनमा पराजित भएका कारण सरकार र सदनमा उनको उपस्थिति रहने छैन ।