सभामुख चयनका लागि प्रतिनिधिसभा बैठक जारी

५ माघ, काठमाडौं । सभामुख चयनका लागि प्रतिनिधिसभा बैठक जारी छ । बिहान ११ बजे बैठकमा सभामुख चयनसम्बन्धी प्रक्रिया अघिसँगै बैठक चलिरहेको छ । बैठकमा उम्मेदवारहरुले पदका लागि प्रस्ताव राखेका छन् ।

बैठकमा सभामुखका उम्मेदवारद्वय एमालेका देवराज घिमिरे र कांग्रेसकी ईश्वरी देवी न्यौपानेका प्रस्तावक र समर्थकहरुले धारणा राख्ने क्रम चलिरहेको छ । बैठक सभाका ज्येष्ठ सदस्य राप्रपाका सांसद पशुपति शमसेर जबराले गरिरहेका छन् ।

एमालेका सांसद घिमिरेलाई एमालेसहित माओवादी, राष्ट्रिय स्वतन्त्र पार्टी, राप्रपालगायत दलहरूको साथ छ । प्रतिनिधि सभामा एमालेका ७९, माओवादीका ३२, रास्वपाका २० र राप्रपाका १४ जना सांसद छन् । सत्ता साझेदार अन्य दलहरूले पनि घिमिरेलाई साथ दिने सम्भावना छ ।

प्रतिनिधि सभामा कांग्रेसका ८९ सांसद भए पनि ८८ जनाले मात्र मतदान गर्न पाउँछन् । नेकपा एकीकृत समाजवादीका १० जना सांसद छन् । जसपा पनि समर्थनमा आएमा उसको १२ जना सांसद छन् भने लोसपाको ४ जना सांसद छन् ।

२७५ सदस्यीय प्रतिनिधि सभामा बहुमतका लागि १३८ जना सांसदको समर्थन चाहिन्छ ।