सभामुख घिमिरेले भने,‘अब म एमाले रहिन’

६ माघ, काठमाडौं । नवनिर्वाचित सभामुख देवराज घिमिरे एमालेको पार्टीगत जिम्मेवारीबाट अलग भएको बताएका छन् । उनले शुक्रबार विज्ञप्ति जारी गर्दै सभामुखको निष्पक्ष भूमिका निर्वाह गर्नुपर्ने भएकाले पार्टीको जिम्मेवारीबाट अलग भएको घोषणा गरेका हुन् ।

’म प्रतिनिधि सभाको समाभुख पदमा निर्वाचित भएको र यस पदको भूमिकालाई स्वतन्त्र र निष्पक्ष रुपमा निर्वाह गर्नका लागि नेकपा (एमाले) को पार्टी सदस्यता र पार्टी सम्बद्ध सम्पूर्ण राजनीतिक, सांगठनिक जिम्मेवारीबाट अलग भएको जानकारी गराउँदछु’ घिमिरेले भनेका छन् । उनी हाल एमालेको स्थायी कमिटी सदस्य थिए । बिहीबार सभामुख निर्वाचित भएका घिमिरेले शपथ ग्रहणपछि आजैबाट पदभार सम्हाल्दैछन् ।

बिहीबार सत्ता गठबन्धनकातर्फबाट सभामुखमा निर्वाचित भएका घिमिरेले आज विज्ञप्ति जारी गर्दै आफै एमालेको सदस्यता त्यागेको जानकारी गराएका हुन् । यससँगै उनी एमालेको सबै जिम्मेवारीबाट अगल भएका छन् । घिमिरे नेकपा एमालेकातर्फबाट झापा–२ बाट प्रतिनिधि सभामा निर्वाचित भएका थिए ।