पहिलेको राजनीतिक संलग्नतालाई अनुभूति हुन दिन्नः सभामुख

 ७ माघ, काठमाडौं । प्रतिनिधिसभाका सभामुख देवराज घिमिरेले सभामुखमा निर्वाचित भइसकेपछि आफूले विगतको राजनीतिक सक्रियता र संलग्नतालाई प्रतिनिधिसभामा अनुभूति हुन नदिने बताएका छन् । उनले विगतको राजनीतिलाई थाती राखेर संवैधानिक मर्यादा र भूमिकालाई इमान्दारीपूर्वक निभाउने प्रतिवद्वता जनाएका छन् । प्रतिनिधिसभाको शनिबारको बैठकमा पहिलो सम्बोधन गर्दै सभामुख घिमिरेले सभामुखको तटस्थ निष्पक्ष र समन्वयकारी भूमिकामा आफू सचेत र क्रियाशील रहेको बताए ।

उनले भने,‘सभामुखको निर्वाचनसँगै म आबद्ध रहेको राजनीति दल नेकपा एमालेसँगको सबै प्रकारको आवद्धता यो पदमा क्रियाशील रहँदासम्म परित्याग गरि सकेको छु । सभामुखको पद तटस्थ, निष्पक्ष र समन्वयकारी हुने भएकोले यो पदको गरिमा र शाखको अभिवृद्धि गर्नु मेरो संवैधानिक दायित्व हो भन्ने कुरामा म सदैव सचेत र क्रियाशील रहने छु । संसदमा राजनीतिक दलहरुको बीचमा दार्शनिक, नीतिगत र कार्यक्रमिक प्रतिस्पर्धा हुनु यसको आधारभूत चरित्र नै हो । संसद्मा हुने नीतिगत बहस विमर्श र स्वस्थ प्रतिस्पर्धा नै संसदीय व्यवस्थाको जीवन्तता हो ।’

उनले आफू बेलायती संसदीय अभ्यासको क्रममा विकसित भएको ‘सरकार सत्तापक्षको, संसद प्रतिपक्ष’को भन्ने मान्यतामा प्रष्ट रहेको भन्दै संसद्लाई तदनुकुल सञ्चालन गर्ने बताए । उनले जनताले आफ्नो सार्वभौमिक अधिकारको प्रयोग गर्ने उच्चतम थलो प्रतिनिधिसभामा त्यो अधिकारको प्रयोग गर्नका लागि दलहरुबाट सहयोग हुने अपेक्षा राखेको बताए ।

उनले राजनीतिक दलहरुका बीचमा यदाकदा संसद्मा हुने बहस र विमर्शको क्रममा उत्पन्न हुन सक्ने स्वभाविक प्रतिस्पर्धा र मनमुटावलाई आपसी संवाद र समन्वयको माध्मबाट समाधान गर्न म सदैव क्रियाशील रहने बताए । प्रतिनिधिसभामा उपस्थित सबै राजनीतिक दल र माननीय सदस्यहरुलाई त्यस प्रयोजनका लागि सभामुखको कार्यकक्ष सदैव खुल्ला रहने उनको भनाइ छ ।