पार्टीका भावि कार्यक्रम र केन्द्रीय समितिबारे कांग्रेसले थाल्यो छलफल

९ माघ, काठमाडौं । नेपाली कांग्रेसले माघ १५ देखि बस्ने केन्द्रीय समिति बैठक र समसामयिक राजनीतिक विषयमा छलफल सुरु गरेको छ । पार्टी सभापति शेरबहादुर देउवा निवास धुम्बाराहीमा बसेको पदाधिकारी बैठकमा छलफल सुरु भएको हो ।

सभापति देउवाले धुम्बाराहीमा पछिल्ला राजनीतिक घटनाक्रमको बारेमा छलफल पदाधिकारी बैठक बोलाएका हुन् । केहीबेर अघि सुरु भएको छलफलमा केन्द्रीय समिति विस्तार, विभागको कार्य विभाजन र भातृसंस्थाको नेतृत्वका विषय उठाइएको छ । यस अघिको पदाधिकारी बैठकमा सभापति देउवाले केन्द्रीय समितिलाई पुर्र्णता दिने जानकारी गराएका थिए ।

यस्तै भातृ र शुभेच्छुक संस्थामा पनि नेतृत्व चयन गर्ने तयारी भइरहेको छ । ती संस्थामा तत्काल पदाधिकारी भने नियुक्ति नगर्ने यसअघिका बैठकमा भनिएको थियो । बैठकमा सरकारलाई समर्थन दिएपछि उत्पन्न परिस्थिति, प्रतिपक्ष दलको मान्यता, सभामुख र उपसभामुख निर्वाचनको समीक्षा र राष्ट्रपति निर्वाचनको तयारीबारे पनि छलफल हुने बताइएको छ ।

आइतबार मात्रै कांग्रेसको शेखर कोइराला पक्षका नेताहरूको बैठक बसेको थियो । उनीहरूले प्रधानमन्त्रीलाई विश्वासको मत दिनु गल्ती भएको बताएका थिए । आजको पदाधिकारी बैठकमा पनि पछिल्लो राष्ट्रिय राजनीतिका बारेमा छलफल र समीक्षा हुने नेताहरूले बताएका छन् ।