आत्मदाहको घटना र कारणबारे राज्य गम्भिर बन्नुपर्छः कोइराला

११ माघ, काठमाडौं । नेपाली कांग्रेसका नेता डा. शेखर कोइरालाले संसद भवन अगाडी आत्मदाहको प्रयासबाट भएको इलामका प्रेमप्रसाद आचायको मृत्यु सामान्य विषय नभएको भन्दै यसप्रति राज्य गम्भिर हुनुपर्ने बताएका छन् । उनले यो घटनाले राज्यलाई लज्जित बनाएको भन्दै यस्तो वातावरण बन्नुको कारण पनि राम्राे नभएको बताएका छन् ।

समाजिक सञ्जालमा नेता कोइरालाले यस्ता घटना सिर्जना हुनुका पछाडी राज्य जिम्मेवार रहेकाले आम नागरिकप्रति राज्यले उत्तरदायित्व विर्सिएको उल्लेख गरेका छन् । उनले अझै युवाले गरेको आत्मदाह र त्यस पछाडिको कारणबारे बहस गर्नुको साटो राजनीतिक दल र नेताहरु सत्ताको लुछाचुडीमा व्यस्त रहनु लज्जास्पद भएको टिप्पणी गरेका छन् ।

यस्तो परिस्थिति दोहोरिन नदिने वातावरणको श्रृजना गर्ने कि सत्ताको अंकगणितमा मै सरकार अल्झिरहने हो सरकारले यसको उत्तर दिनुपर्ने उनको भनाइ छ ।

आत्मदाहको प्रयास गर्ने इलामका ३६ वर्षीय प्रेमप्रसाद आचार्यको उपचारका क्रममा आज बिहान मृत्यु भएको छ । कीर्तिपुरस्थित बर्न अस्पतालमा उनको मृत्यु भएको हो । अस्पतालका प्लाष्टिक सर्जरी विभाग प्रमुख किरण नकर्मीले आज बिहान ५ बजे आचार्यको मृत्यु भएको जानकारी दिए ।