अनेरास्ववियुले माग्यो गृहमन्त्री लामिछानेको राजीनामा

११ माघ, काठमाडौं । सत्ताबाहिर रहेको नेकपा एकीकृत समाजवादीनिकट भातृ संगठन अखिल नेपाल राष्ट्रिय स्वतन्त्र विद्यार्थी यूनियन (अनेरास्ववियू)ले गृहमन्त्री रवि लामिछानेको राजीनामा माग गरेको छ । उसले विभिन्न आरोप र मुद्दा खेपिरहेका गृहमन्त्री लामिछानेलाई कुर्सीमा बस्ने नैतिक अधिकार नभएको भन्दै राजीनामा माागेको हो ।

अनेरास्ववियुले केन्द्रीय कमिटी र पदाधिकारीको बैठकले गरेका निर्णयहरु सार्वजनिक गर्दै गृहमन्त्रीको राजीनामा मागेको हो । अनेरास्ववियूले प्रेस विज्ञप्ति सार्वजनिक जारी गर्दै अहिलेको सरकारका मन्त्रीहरु बहुरुपी र बहुरङ्गी भएको आरोप लगाएको छ । कोही मन्त्रीहरु संघीयता खारेजीको वकालत र कोही मन्त्रीहरु काम र परिणामभन्दा पनि मिडिया स्ट्रन्टमा केन्द्रित भएको उसको भनाइ छ ।

हत्या अभियोग लागेका अपराधीहरु संसदीय अभ्यासमा सहभागी भइरहदा खोजि गर्न नसक्नु लाजमर्दो भएको विज्ञप्तीमा उल्लेख छ ।
अनेरास्ववियुले आफ्नै नागरिकता सम्बन्धि प्रश्न उठेका गृहमन्त्री शान्ति सुरक्षाप्रति जवाफदेही हुननसक्ने र राज्यलाई जनउत्तरदायी बनाउन पनि गृहमन्त्रीले राजीनामा दिनुपर्ने भनेको छ । बैठकले मध्यपश्चिम विश्वविद्यालयले चैत्र ३ गते गरेको स्ववियू निर्वाचन घोषणाको स्वागत गर्ने, मंगलबारमात्रै आत्मदाह गरेका प्रेमप्रसाद आचार्यलगायतका विषयमा विभिन्न निर्णय भएको जनाइएको छ ।