आचार्यले आत्मदाहको प्रयास गर्नुका कारण र उठाएका विषयबारे छानबिन गर्ने जिम्मा गृहलाई दिइयो

११ माघ, काठमाडौं । आत्मदाहको प्रयासपछि उपचारका क्रममा मृत्यु भएका इलामका प्रेमप्रसाद आचार्यले फेसबुकमार्फत उठाएका विषयमा सरकारले छानविन गर्ने भएको छ । बुधबार बसेको मन्त्रिपरिषदको बैठकले आचार्यले उठाएका विषयमा छानबिन गर्न जिम्मा गृह मन्त्रालयलाई दिएको छ ।

मंगलबार आत्मदाहको प्रयासपछि उद्धार गरी उपचारका लागि अस्पताल पुर्याएका आचार्यको बुधबार मृत्यु भएको थियो । उनको मत्युपछि सरकारबारे विभिन्न प्रश्न उठेका छन् । उनको विषयमा छानबिन गरी यथाशीघ्र प्रतिवेदन तयार पार्न मन्त्रिपरिषद्ले गृह मन्त्रालयलाई जिम्मेवारी दिएको छ । आचार्यको परिवारलाई राहतलगायत विषयमा पनि निर्णय गर्ने जिम्मेवारी मन्त्रिपरिषद्ले गृह मन्त्रालयलाई दिएको छ ।

मन्त्रिपरिषद्ले आचार्यले सामाजिक सञ्जाल फेसबुकमा उठाएका विषय तथा आत्मदाह प्रयासको कारणबारे पत्ता लगाउन गृह मन्त्रालयलाई जिम्मेवारी दिएको हो । आत्मदाहको प्रयास गरेका आचार्यले सामाजिक सञ्जालमा उठाएका सबै विषयमा यथाशीघ्र छानबिन गरी प्रतिवेदन तयार पार्न र त्यससम्बन्धमा सरकारले के के गर्नुपर्ने हो सुझाव तयार पार्ने गृहलाई भनिएको छ ।