चर्चित लोकदोहोरी गायक भीम पौडेलको निधन

१३ माघ, काठमाडौं । लोकदोहोरी क्षेत्रका चर्चित गायक भीम पौडेलको निधन भएको छ । राष्ट्रिय लोकदोहोरी गीत प्रतिष्ठानका अध्यक्ष रमेश बीजीले गायक पौडेलको निधन भएको जानकारी दिएका छन् ।

प्रत्यक्ष दोहोरी गीत गाउन माहिर उनका दर्जनौं गीत चर्चामा छन् । गीत गाएर चर्चित बनेका उनको निधन स्याङ्जास्थित घरमै गएराति १२ बजेतिर भएको हो ।

दुई महिनादेखि बिरामी भएर उपचार गराइरहेका उनी स्याङजा घरमै थिए । शरीरमा रगतको कमी हुने रक्तअल्पताको कारण उनको घरमै निधन भएको हो ।

पौडेलको पार्थिव शरिरलाई शुक्रबार नै पोखरास्थित रामघाटमा अन्तिम संस्कार गरिँदैछ । उनलाई श्रद्धाञ्जली दिन काठमाडौंबाट केही कलाकार पोखरा पुगेका छन् । प्रतिष्ठानका अध्यक्ष बीजीले फेसबुकमार्फत श्रद्धाञ्जली व्यक्त गर्दै आफू स्तब्ध भएको उल्लेख गरेका छन् ।

तिमी अब छैनौ हामीसँगै भन्ने कुरा पत्यारै लाग्दैन तर सहनुको बिकल्प रहेन मेरो भाइ १ यो लोकमा परेका वाधा व्यवधान र रोगव्याधी सबै हटेर स्वर्गलोकमा तिमीले नै राज गर्नु मेरो भाइ । अलविदा ! उनले लेखेका छन् ।

यस्तै लोकदोहोरीका चर्चित गायिका टिका सानुले पनि फेसबुकमार्फत पौडेलको निधनले मर्माहित तुल्याएको बताएकी छन् । उनले शुक्रबार सामाजिक संजाल फेसबुकमा स्टाटस लेख्दै लोकदोहोरी क्षेत्रले एक सफल गायक गुमाएको उल्लेख गर्दै श्रद्धाञ्जली व्यक्त गरेकी छन् । फेरि दोहोरी क्षेत्रले अर्को सफल गायक गुमाएको छ, भिम पौँडेल निधन को खबरले मर्माहित छु, हार्दिक श्रध्दाञ्जली भिम दाइ’ उनले लेखेकी छन् ।

सानु र पौडेलबीचको कयौं संख्यामा लोकदोहारी चर्चाको शिखरमा पुगेका छन् । पाैडेल लोकदोहोरी प्रतियोगिताबाट यस क्षेत्रमा विशिष्ठ तवरले प्रवेश भएका थिए ।

पौडेल हासिलो र मिलनसार रहेको जनाउँदै लोकदोहोरी क्षेत्रमा आवद्ध संघसंस्था र व्यक्तिहरुले पौडेलको निधनले पूरणीय क्षति पुगेको जनाएका छन् । यूट्यूबमा उनका गीत प्रशस्त सुन्न सकिन्छ ।