सल्लाहकार नियुक्तिको विषयले माओवादी बैठकमा गरमागर्मी बहस

१३ माघ, काठमाडौं । सरकार गठन भएको एक महिना बित्न लागेपछि प्रधानमन्त्री पुष्पकमल दाहाल ‘प्रचण्ड’ले आफनो मुख्य सल्लाहकारका रुपमा पार्टीका उपमहासचिव हरिबोल गजुरेललाई नियुक्त गरेसँगै पार्टीभित्र असन्तुष्टि देखिएको छ । पार्टीको पदाधिकारी तथा स्थायी कमिटी बैठकमा सल्लाहकारको विषयलाई लिएर असन्तुष्टि देखिएको हो । विहीबार बसेको बैठकमा प्रधानमन्त्रीले आफ्नै किचन क्याविनेटलाई सरकारी सल्लाहकारमा नियुक्ति गरेर पार्टीलाई वेवास्ता गरेको भन्दै असन्तुष्टि देखिएको हो ।

पूर्वमन्त्री समेत रहेका गजुरेललाई मन्त्री सरहको सेवा सुविधा पाउने गरी प्रधानमन्त्री प्रचण्डले मुख्य सल्लाहकारमा नियुक्त गरेपछि अन्य सल्लाहकार पनि नियमित रुपमा प्रधानमन्त्रीको कार्यालय र वालुवाटार पुग्ने गरेको र उनीहरुले सबै प्रचण्डका यसअघिकै सल्लाहकार भएकाले नयाँ काम र सरकारी कामका लागि बाधक हुने भएकोमा पार्टीभित्र कुरा उठेको एक नेताले बताए । प्रधानमन्त्री प्रचण्डले मूख्य सल्लाहकारमा नियुक्ति दिएपछि प्रधानमन्त्रीको आधाजसो अदृष्य र अनौपचारिक जिम्मेवारी गजुरेलमा सरेको छ । ‘किचन क्याविनेटमा भन्दा माथि मूख्य सल्लाहकार छन् तर पनि सबै काम त्यही पुरानै किचन क्याविनेटबाटै हुनेछन’, माओवादीका एक नेताले भने ।

सरकारको नेतृत्व सम्हालेको ठिक एक महिना बितेको छ । पुस १० मा प्रधानमन्त्री नियुक्त भएका प्रचण्डले यो एक महिनाको बीचमा संसदमा असाधारण विश्वासको मत पाएपछि उनले आफ्नो किचन क्याविनेटलाई विस्तार गर्दै हरिबोल गजुरेलसम्म आइपुगेको हो । प्रधानमन्त्री प्रचण्डले आफनो परराष्ट्र सल्लाहकार, आर्थिक सल्लाहकार लगायतका अन्य केही महत्वपूर्ण सल्लाहकारहरुको नियुक्ति गरिसकेका छैनन् । यद्यपि उनले राइट प्लेस, राइट म्यानको खोजी गरिरहेको भनिरहेका छन् । यसमा अन्य नेताहरुको पनि रुची रहेकाले कसलाई जागिर खुवाउने भन्नेबारेमा अझै अन्यौल कायमै रहेको छ । ‘त्यहाँ पार्टीले सिफारिस गरेका मानिसहरुलाई लैजानुपर्ने भन्दै कुरा उठेको हो, सरकारी र निजी सल्लाहकार एकै व्यक्ति हुनु समस्या हो’, ती पदाधिकारीको दावी छ ।

प्रधानमन्त्रीको प्रमुख स्वकीय सचिवमा जनयुद्धकालका जनमुक्ति सेनाका डिभिजन कमाण्डर समेत रहेका पार्टीका पोलिटब्यूरो सदस्य सन्तु दरै ‘परवाना’लाई नियुक्त गरेका छन् । उनी दोस्रो संविधानसभामा सदस्य पनि थिए । त्यसबेला देखि नै उनी प्रचण्डको सचिवालय भित्रै रहेर काम गरिरहेका छन् । दराईपछिको मर्यादाक्रम हुने गरी स्वकीय सचिवमा प्रधानमन्त्रीले दुई जना नियुक्त गरेका छन् । पार्टीका नेता रमेश मल्ल र छोरी समेत रहेका गंगा दाहाललाई प्रधानमन्त्रीले स्वयिक सचिवका रुपमा नियुक्त गरेका छन् ।

मल्ल प्रचण्ड पहिलो पटक प्रधानमन्त्री हुँदा पनि स्वकीय सचिवको जिम्मेवारीमा रहेका थिए । गंगा भने प्रचण्डको सचिवालयमा प्रकाश दाहालको निधनपछि निरन्तर छिन् । मल्ल र दाहाल दुवै माओवादीको केन्द्रीय समितिमा पनि छन् । प्रधानमन्त्रीले ४ जनालाई स्वकीय सहसचिवको रुपमा नियुक्त गरेका छन् । त्यसमा सञ्चार विज्ञका रुपमा पार्टीका बैकल्पिक केन्द्रीय सदस्य मनहरि तिमल्सिना, प्रेस संयोजकको रुपमा सूर्यकिरण शर्मा, शिव खकुरेल र गोकर्ण भटट नियुक्त भएका छन् ।

त्यस्तै फोटोग्राफरका रुपमा प्रदीपराज वन्त नियुक्त भएका छन् । तिमल्सिना यस अगाडी प्रचण्ड दोस्रो पटक प्रधानमन्त्री हुँदा पनि प्रकाश दाहालसँगै सचिवालयमा रहेर प्रेसकै भूमिकामा थिए । शर्मा भने केही समय अगाडी देखि निरन्तर प्रचण्डको प्रेस संयोजकको जिम्मेवारीमा रहेर काम गरिरहेका थिए । खकुरेलले प्रचण्ड पहिलो पटक प्रधानमन्त्री हुँदा सचिवालयमा रहेर काम गरेका थिए । उनी माओवादी पार्टीको केन्द्रीय कार्यालयमा रहेर सञ्चार र अन्य प्राविधिक विषयका काम गर्थे । भटट पनि यसपटक प्रधानमन्त्रीको सचिवालयमा रहेर काम गर्नेमा पुगेका छन् । यसैगरी अब नियुक्ति हुने सल्लाहकारमा पार्टीभित्र विशेष दख्खल भएका व्यक्तिलाई नियुक्ति गर्न प्रचण्डलाई पार्टी कमिटीले सल्लाहसमेत दिएको छ ।