मेयर बालेनको ‘ज्यादाति’को विरोधमा २ बजे माइतीघर मण्डलामा प्रदर्शन हुँदै

१५ माघ, काठमाडौं । काठमाडौं महानगरका मेयर बालेन्द्र साह ‘वालेन’ले ज्यादाति मच्चाएको भन्दै साना व्यवसायी तथा सरोकारवालाहरुले आज विरोध प्रदर्शन गर्ने भएका छन् ।

साह नेतृत्वको काठमाडौं महानगरपालिकाले विकल्प नै नदिई फुटपाथ व्यापारीलाई बल प्रयोग गरी लखेट्ने काम नछाडेपछि पनि सर्वसाधारण समेत आक्रोशमा उत्रिने संभावना बढेको छ ।

मुलतः महानगरका प्रहरीले फुटपाथ र साइकलमा सामान राखेर बिक्री गर्नेहरुमाथि बल प्रयोग गर्ने र उनीहरुको सामान खोसेर लगेर हाकिम, कर्मचारी र नातागोतालाई बाँड्ने गरिएको पाइएपछि सर्वत्र आक्रोश बढ्दै गएको हो । नगर प्रहरीले सागपात, तरकारी, फलफूल कब्जा लिएर लैजाने र सित्तैमा बाँड्ने गरिएको आरोप विरोधीहरुको छ ।

कुनैबेला साहकै सहयात्री रहेका सुमन सायमी विरोधको पक्षमा उभिएका छन् । उनले आजको खबरदारी सभा भनिएको विरोध प्रदर्शनमा सहभागिता जनाउने भएका छन् ।

भरपर्दा विकल्प नै नदिई बस्तीमा डोजर चलाउने चेष्टा गरेको भन्दै साहविरुद्ध थापाथलीका सुकुम्बासीका बस्तीका ‘पीडित’हरुले खुकुरी निकालेर खबरदारीको प्रदर्शन गरेका थिए । सोही कारण बस्तमाथि डोजर चलाउन मेयर साह असफल बन्दै आएका छन् । पछिल्लो पटक उनले गृहमन्त्रालयसँग बस्ती हटाउन सुरक्षाकर्मीको सहयोग खोजेपनि पाउन सकेनन् ।

आज दिउँसो २ बजे माइतीघर मण्डलामा डोजर ‘आतक’बाट पीडित, विस्थापित फुटपाथ व्यापारी, टुकुचा खोला उत्खनन्का पीडितहरु सहभागी हुने जनाएका छन् ।

प्राकृतिक खोला छोपेर माथिपटिट् घर बनाएको भन्दै साहले खोलामाथिका घर भत्काउने क्रममा कमलादी, जयनेपाल सिनेमा हल क्षेत्रमा डोजर चलाएका थिए । जसको विरोधमा स्थानीयले प्रतिवाद गर्दै आएका छन् । अदालतबाट समेत तत्काल डोजर चलाउने बन्द गर्न आदेश दिएको अवस्था छ ।

प्रदर्शनमा महानगरभित्रका विभिन्न टोल सुधार समिति र क्लबहरूबाट पनि प्रतिनिधित्व रहने बताएका छन् । प्रदर्शन विशाल आन्दोलनको तहमा उठाउने योजना विरोधीहरुले गरेका छन् ।

साह गएको बैशाख ३० मा सम्पन्न स्थानीय तहको निर्वाचनमा अत्याधिक मत ल्याएर स्वतन्त्र उम्मेदबारबाट मेयर विजयी भएका थिए । उनले काठमाडौं महानगरलाई संस्कृति र सम्पदाको शहर बनाउने बताउँदै आएका छन् ।