मेयर बालेनविरूद्ध काठमाडौंमा चर्काे नारा लगाउँदै प्रदर्शन

१५ माघ, काठमाडौं । उपत्यका व्यापी सडक विस्तार पीडित संघर्ष समितिलगायत विभिन्न संगठनहरुले काठमाडौंमा प्रदर्शन गरेका छन् । आइतबार  माइतीघर मण्डलामा जम्मा भएर महानगरपालिकाले सडक विस्तारका नाममा गैरकानुनी ज्यादति गरेको भन्दै उनीहरूले मेयर बालेन साहविरूद्ध चर्का नारा लगाउँदै प्रदर्शन गरेका हुन् ।

कुनै समय मेयर साहका सहयात्री रहेका सुमन सायमीले महानगरले सडक विस्तारका नाममा बिना अध्ययन, अनुसन्धान डोजर चलाएको लगाए । महानगरका मेयर बालेन शाहले जवाफदेहिता बिना काम गरेको उनको भनाइ छ ।

महानगरभित्र फुटपाथ, साइकल व्यवसायीमाथि महानगरका प्रहरीले गुण्डगर्दी शैलीमा नागरिकमाथि दमन चलाएको र व्यवसायीहरुको सामान कब्जा गरेर नष्ट बनाएको भन्दै उनले आक्रोश पोखे । बालेन शासकभन्दा निरंकुश बन्ने बाटाेमा लागेकाे उनकाे भनाइ थियाे ।

प्रदर्शनमा सहभागीहरूले डोजर आतङ्क बन्द गर्न, सडक विस्तारको नाममा उठिबास नगर्न, आदिवासीको भूमिको अधिकार सुनिश्चित गर्न माग गरेका छन् ।