सुकुम्वासी हटाउनेबारे सत्ता पक्षका दलसँग सल्लाह गरेर निर्णय दिन्छुः प्रधानमन्त्री

१६ माघ, काठमाडौं । प्रधानमन्त्री पुष्पकमल दाहाल ‘प्रचण्ड’ले काठमाडौं महानगरपालिकाका मेयर बालेन्द्र शाहलाई वाग्मती करिडोरमा रहेका सुकुम्वासी हटाउनेबारे सत्ता गठबन्धन दल र सरोकार पक्षसँग छलफल गरेर निर्णय दिने बताएका छन् । मेयर शाहले सोमबार विहान बालुवाटार पपुगेर प्रधानमन्त्री प्रचण्डसमक्ष सुकुम्बासी हढाउन सरकारको सहयोग मागेका थिए ।

प्रधानमन्त्री पुष्पकमल दाहाल ‘प्रचण्ड’सँगको भेटमा थापाथलीमा रहेका सुकुम्वासी हटाउन सरकारको सहयोग मागपछि उनले यस्तो जवाफ दिएका हुन् । मेयर शाहका स्वकीय सचिव भुपदेव शाहका अनुसार प्रधानमन्त्री यस विषयमा सकारात्मक रहेको र सबै पक्षसँग छलफल गरेर निर्णय दिने बताएका थिए । यसअघि थापाथलीमा रहेका सुकुम्वासी हटाउन महानगरले गरेको प्रयास असफल भएको थियो । मेयर शाहले तत्कालिन गृहमन्त्री रवि लामिछानेसँग पनि सहयोग मागेका थिए ।

यसअघि सुकुम्वासी हटाउन पुगेका महानगरका सुरक्षाकर्मीमाथि त्यहाँ रहेका स्थानीय आक्रमणमा उत्रिएपछि महानगर पछि हटेको थियो । त्यसलगत्तै सहयोग माग्न तत्कालीन प्रधानमन्त्री शेरबहादुर देउवासमक्ष मेयर बालेन पुगेका थिए । तर देउवाले पनि सुकुम्वासी समस्या दवावले समाधान गर्न नसकिने बताएका थिए ।

सरकारको समन्वयबिना किन हटाउने प्रयास गरेको भन्दै अहलिे मेयर बालेनको चौतर्फि विरोध भइरहेको छ भने उनीमाथि विभिन्न प्रश्नसमेत उठेका छन् । बालेनले यसअघि पनि गृह मन्त्रालयसँग सहयोग मागेका थिए । गृहले स्थायी समस्या समाधानको प्रयास गर्नुपर्ने भएकाले बल प्रयोग गरेर हटाउन नहुने सुझाव दिएको थियो । प्रधानमन्त्री दाहालसँगको भेटमा अन्य विषयमा पनि कुराकानी भएको मेयरका स्वकीय सचिव शाहले जानकारी दिएका छन् ।