शरीरमा आगो लगाएर आत्मदाहको प्रयास गर्नेलाई बचाउँदा जलेकी महिलाको मृत्यु

१६ माघ, पोखरा । पोखरा महानगरपालिका–१३ काहूँखोलामा आइतबार डेरावाल युवकलाई बचाउने क्रममा जलेर घाइते भएकी महिलाको उपचारका क्रममा मृत्यु भएको छ ।

काहूँखोलाकी ४० वर्षीया संगीता सापकोटाको पोखरा स्वास्थ्य विज्ञान प्रतिष्ठानमा उपचारका क्रममा सोमबार मृत्यु भएको हो ।

सापकोटालाई भेन्टिलेटरमा राखेर उपचार गरिएकोमा आज बिहान ११ बजे मृत्यु भएको प्रतिष्ठानका निर्देशक डा। भरतबहादुर खत्रीले बताए ।

सापकोटाको घरमा स्टेशनरी सञ्चालन गर्दै आएका ४३ वर्षीय कृष्णबहादुर क्षत्रीले आइतबार बाथ रूममा शरीरमा आगो लगाएर आत्मदाहको प्रयास गरेका थिए । क्षत्रीलाई बचाउने क्रममा घरबेटी स्वंय सख्त घाइते भएकी थिइन् ।

दुवै जनालाई छिमेकीले उद्धार गरी अस्पताल पुर्‍याएका थिए ।अस्पतालमा उपचार गराइरहेका क्षेत्रीको हात, खुट्टा र अनुहार जलेको छ । उनको अवस्था हालसम्म सामान्य रहेको चिकित्सकले बताएका छन् ।

आत्मदाहको प्रयास गर्नुको कारण भने हालसम्म खुलेको छैन । शरीरमा आगो लगाउनुका कारणबारे उनले अहिलेसम्म मुख नखोलेको बताइएको छ ।

सापकोटा क्षेत्रीलाई बचाउने क्रममा घाइते भएकी हुन् वा स्वयंं पनि आत्मदाहको प्रयासमा थिइन् भन्नेबारे अनुसन्धान भइरहेको प्हरीले जनाएको छ ।