पार्टीको आगामी एजेण्डाबारे छलफल गर्न बसेको माओवादी पदाधिकारी बैठक जारी

१६ माघ, काठमाडौं । पार्टीका आगामी रणनीति र पछोल्लो विकसित राजनीतिक अवस्थाबारे छलफल गर्न बसेको नेकपा माओवादी केन्द्रको पदाधिकारी बैठक पार्टी केन्द्रीय कार्यालय पेरिसडाँडामा जारी छ । केशिबेर अघि सुरु भएको बैठकमा अध्यक्षसमेत रहेका प्रधानमन्त्री पुष्पकमल दाहाल प्रचण्ड पनि सहभागी भएका छन् ।

बैठकम यसअघि स्थायी कमिर्टीले लिएका निर्णयहरु र समसामयिक राजनीतिक घटनाक्रमबारे छलफल भइरहेको बताइएको छ । माओवादीले स्थायी कमिटी बैठक दुइदिन छलफल गरि त्यसलाई स्थगित गरेर पदाधिकारी बैठक सुरु भएको हो । बैठकमा सरकारका कामबारे पनि समीक्षा हुने बताइएको छ ।

पदाधिकारी बैठकमा गृह मन्त्रालयबारे पनि छलफल हुने एक नेताले बताए । माओवादीले नै गृह मन्त्रालय राख्ने गरी छलफल भइरहेका छन् । तर राष्ट्रिय स्वतन्त्र पार्टीले आफूहरूले गृह मन्त्रालय पाउनुपर्ने अडान राखेको छ । रास्वपाबाट सभापति रवि लामिछाने यसअघि उपप्रधान एवं गृहमन्त्री थिए । गत शुक्रबार नागरिकता मुद्दामा उनको सांसद पद बदर भएसँगै उपप्रधान र गृह मन्त्रीबाट उनले राजीनामा दिएका थिए ।

आइतबार नेपाली नागरिकता कायम गरेसँगै लामिछाने रास्वपा सभापति भइसकेका छन् भने उनले प्रधानमन्त्रीलाई भेटेर आफूलाई गृह मन्त्रीमा पुनः नियुक्ति गर्न आग्रह गरिरहेका छन् । माओवादीभित्र भने महत्वपूर्ण मन्त्रालय पार्टीसँग नरहेको भन्दै गृह मन्त्रालय राख्न प्रधानमन्त्रीमाथि दवाव परिरहेको छ ।