सात दलको नीतिअनुसार सरकार चल्छः महासचिव पोखरेल

१६ माघ, विराटनगर । नेकपा एमालेका महासचिव शंकर पोखरेलले सात राजनीतिक दलको साझा नीतिका आधारमा सरकार निर्माण भएकोले यीनै दलले बनाएका साझा नीतिअनुसार सरकार सञ्चालन हुने बताएका छन् । उनले कुनै एकदलको चाहना अनुसार मात्र सरकार अगाडी बढ्न नसक्ने बताएका छन् ।

विराटनगर विमानस्थलमा सोमबार सञ्चारकर्मीसँग कुरा गर्दै उनले राष्ट्रपतिको उम्मेदवारमा राष्ट्रिय सहमति कायम गर्ने भन्नु सत्तापक्षका उम्मेदवारका लागि सहमति खोज्नु भन्ने रहेको बताए । उनले सरकारमा सहभागि दलभन्दा बाहिरबाट राष्ट्रपति नआउने बताए । राष्ट्रिय सहमति कायम गर्नु भनेको सत्तापक्षका उम्मेदवारका लागि सबैको सहमति खोज्नु हो,’ महासचिव पोखरेलले भने ।

केन्द्र र सातवटै प्रदेशमा सत्तापक्षको बहुमत रहेकाले राष्ट्रपतिमा सत्तापक्षको उम्मेदवार विजयी हुने विश्वास उनले व्यक्त गरे । उनले नेपाली कांग्रेसले प्रतिपक्षमा बसेर राज्यको प्रमुख दाबी गर्न नमिल्नेसमेत प्रस्ट पारेका छन् ।