मुख्यसचिवको निर्णय कार्यान्वयन हुँदैनः प्रधानमन्त्री प्रचण्ड

१६ माघ, काठमाडौं । प्रधानमन्त्री पुष्पकमल दाहाल ‘प्रचण्ड’ले मुख्यसचिव शंकरदाश बैरागी नेतृत्वको सूचना वर्गीकरण समितिले ८७ प्रकारका नीतिगत विषय गोप्य राख्ने गरी गरेको सूचनाको वर्गीकरणको निर्णय तत्काल कार्यान्वयन नहुने बताएका छन् । प्रधानमन्त्री प्रचण्डलाई जानकारी नै नदिएर मुख्यसचिव बैरागीले यस्तो निर्णय गराएका थिए ।

यसको चारैतिर विरोध सुरु भएपछि अचम्ममा परेका प्रधानमन्त्री प्रचण्डले सरोकारवालसँगको सोमबार छलफल गरी यो निर्णय कार्यान्वयन नगर्ने निर्णय गरेका हुन् । प्रधानमन्त्री प्रचण्ड र सरोकावालाहरुबीच केहिबेर छलफल चलेपछि उनले यो निर्णय कार्यान्वयन नहुने निर्णय लिएको उनका प्रेस संयोजक सूर्यकिरण शर्माले जानकारी दिए ।

मुख्य सचिव शंकरदाश बैरागीको नेतृत्वमा रहेको समितिले सूचना वर्गीकरण गर्दा कतिपय नीतिगत विषयलाई पनि गोप्य सूचनामा वर्गीकरण गरेको भन्दै विरोध सुरु भएको थियो । त्यसपछि प्रधानमन्त्री प्रचण्डले उक्त वर्गीकरणप्रति चासो व्यक्त गर्दै सरोकारवालसँग छलफल गरेका हुन् । छलफलपछि यो निर्णय कार्यन्वयन गर्नबाट सरकार पछि हटेको छ ।