माेटरसाइकल र मोवाइल चोरीमा संलग्न रहेकाे आरोपमा ५ जना पक्राउ

१७ माघ, धनुषा । जिल्लाको विभिन्न स्थानबाट मोटरसाइकल, मोवाइल लगायत वस्तु चोरी गरेको आरोपमा प्रहरीले ५ जनालाई पक्राउ गरेको छ ।

पक्राउ पर्नेमा जनकपुरधाम उपमहानगरपालिका–१४ का रतिश गुप्ता, सर्लाहीको चक्रघट्टा गाउँपालिका–७ का २१ वर्षीय रवीन्द्रकुमार यादव, २२ वर्षीय चन्दनकुमार यादव, जनकपुरधामका सरोज कुमार महतो र श्यामसुन्दर महतो रहेको जिल्ला प्रहरी कार्यालय धनुषाले जनाएको छ ।

गुप्ताविरुद्ध सोमबार बिहान जनकपुरधाम २ शिवचोकस्थित कपडा पसलबाट मोबाईल चोरी गरेको आरोप छ ।

यस्तै रबिन्द्र कुमार यादव र चन्दन कुमारलाई सोमबार राति ८ बजे ज ६ प ७७१४ नम्बरको १५० सीसीको कालो रङको पल्सर मोटरसाईकल चोरी गरेको आरोप छ । उनीहरुले मिथिला नगरपालिका १० लालगढ मोडेल अस्पतालको छेउमा पार्किङ गरी राखेकोमा चोरी गरेर भागेका थिए ।

यस्तै, सरोज कुमार महत्तो र श्याम सुन्दर महत्तोलाई जनकपुरधाम ४ बस्ने संजिव कुमार रायको घरबाट पानी तान्ने मोटर, पेन्ट, आइरन, लत्ता कपडाहरू चोरी गरेर फरार भएको आरोप छ ।

उनीहरुलाई प्रहरीले आजै सार्वजनिक गरेको छ । उनीहरुमाथि आवश्यक अनुसन्धान भइरहेको प्रहरीले जनाएको छ ।